VOV4.Xơ Đăng - Tiô rơkong krếo thế dêi Kăn xiâm phŏ chêh tôm xo rơkong Khu lâp kong têa hlối pro Kăn chêh xo rơkong pơkuâ Vi ƀan cheăng kâ – rêh ối pơlê pơla kơpong châu Á – Thái Bình Dương dêi Khu lâp kong têa ESCAP, sap hâi lơ 22 troh hâi lơ 23/5, pôa Vũ Đức Đam, Ngế pro xiâm phŏ hnê ngăn Chin phuh kô veăng Hneăng hôp roh má 78 dêi ESCAP a Bangkok, Siam. Ƀă dó inâi ‘’Môi tơdroăng kal tơdjuôm vâ thăm mơnhông mơdêk krá tơniăn a châu Á – Thái Bình Dương’’ châ tơkŭm po tro roh leh tơbâ 75 hơnăm mơjiâng ESCAP (1974 – 2022), cho roh vâ hvái ngăn mâu tơdroăng châ tơƀrê ki ESCAP hiăng châ tơƀrê tung thăm mơnhông cheăng kâ – rêh ối pơlê pơla a kơpong châu Á – Thái Bình Dương xuân môi tiah mơnhên ‘na mâu pơloăng mơnúa nôkố ƀă pơkâ troăng prôk la ngiâ, troăng pro tơniăn lĕm ƀă mơnhông mơdêk cheăng kâ – rêh ối pơlê pơla kơpong tung la ngiâ.