VOV4.Xơ Đăng - Kơxo lơ 16/5, a Hngêi Kuô̆k hô̆i Lêo, pôa Xay-xổm-phon Phôm-vi-hản, kăn xiâm hnê ngăn Kuô̆k hô̆i Lếo hiăng tơkŭm po leh tơdah pôa Vương Đình Huệ, kăn xiâm hnê ngăn Kuô̆k hô̆i. Klêi kơ’nâi leh tơdah péa ngế kăn xiâm hnê ngăn Kuô̆k hô̆i hiăng tơpui tơno. Péa ngế kăn xiâm hnê ngăn Kuô̆k hô̆i tối nhên, hlo mâu tơdroăng ki ôh tá tơniăn nôkố tung tơdroăng kong têa ê ƀă tung kơpong, péa pâ rế hlo nhên ki kơnía dêi tơdroăng rak vế ƀă tơbêng tơrŭm cheăng a tơnêi têa achê dêi rơpó, môi hiâm mơno ƀă tơdroăng kring vế ƀă mơnhông dêi Việt Nam ƀă Lếo, ngăn mê cho luât mơnhông, ai pơxúa rêh ối ƀă cho môi tung mâu tơdroăng ki khŏm mơ-eăm pơkâ rak tơniăn ƀlêi chiâng dêi tơdroăng cheăng kăch măng rêm kong têa.

‘Na túa tơrŭm cheăng tung la ngiâ, péa pâ môi tuăn mơdêk pơtroh mâu kăn, trâm mâ pơla kăn xiâm hnê ngăn Kuô̆k hô̆i ƀă pơla mâu Vi ƀan dêi Kuô̆k hô̆i péa tơnêi têa, Khu kăn Kuô̆k hô̆i tơrŭm tơroâ, Khu kăn Kuô̆k hô̆i vâi kơdrâi, Khu kăn Kuô̆k hô̆i hơnăm ối nếo, pơla mâu kăn Kuô̆k hô̆i ƀă Hô̆i đong hnê ngăn rêm râ dêi péa kong têa; tơrŭm tơkŭm po mâu rôh hôp, tơpui tơno rơkê plĕng tung mâu kơvâ cheăng dêi Kuô̆k hô̆i.

Katarina Nga tơplôu ƀă tơbleăng