VOV4.Xơ Đăng - Tung roh lăm pôu pêi cheăng a kong têa Lếo, kơxo lơ 16/5, a pơlê kong xiâm Viêng-chăn, pôa Vương Đình Huệ, Kăn xiâm hnê ngăn Kuô̆k hô̆i hiăng tơdah trâm mâ tơpui tơno ƀă pôa Thongloun Sisoulith, Kăn xiâm pơkuâ hnê ngăn Đảng kong têa Lếo, Kăn xiâm hnê ngăn kong têa Lếo.

Pôa Vương Đình Huệ, Kăn xiâm hnê ngăn Kuô̆k hô̆i koh trâm mâ tơpui tơno ƀă Kăn xiâm hnê ngăn kong têa Lếo

Pôa Vương Đình Huệ loi tơngah kuăn pơlê Lếo nhŏng o kô tơkâ rêm pơloăng mơnúa, pêi pro ƀlêi trâng Pơkâ Hneăng hôp Đảng lâp tơnêi têa roh má XI ƀă pơkâ mơnhông cheăng kâ – rêh ối pơlê pơla 5 hơnăm roh má IX – ‘na liăn ngân hên hĭn, tăng cheăng pêi, pơtối mơjiâng tơnêi têa Lếo hơniâp lĕm, rak tơniăn, môi tuăn, mơnhông mơdêk hên troăng tiô pơkâ xah hô̆i chuh ngiah.

Péa ngế Kăn xiâm pơkuâ kong têa tối rơdêi tung la ngiâ, péa pâ kal mơnhông mơdêk khôi túa tơrŭm, loi tơngah; rơtế dêi pó pêi pro kơtăng mâu tơdroăng môi tuăn khu râ kăn xiâm; tơdroăng mơ-eăm mơdêk tâ mê nếo châ tơbrê tơrŭm pơla péa pâ tung tâi tâng mâu kơvâ cheăng, xua pơxúa dêi kuăn pơlê péa tơnêi têa.

            A Sa Ly tơplôu ƀă tơbleăng