Klăng roh koh phiu ro leh tơbâ 93 hơnăm hâi mơjiâng Đảng Kŏng san Việt Nam, tung tơdroăng phiu ro lâp tơnêi têa dế phiu ro hbrâ tơdah Têt tiô khôi vâi krâ nah dêi hdroâng mơngế Têt Quý Mão a Tíu pêi cheăng Khu xiâm pơkuâ Mô đô̆i gak tơkăng kong dêi kong pơlê An Giang (pơlê kong kơdrâm Châu Đốc, An Giang), pôa Vương Đình Huệ, Kăn xiâm hnê ngăn Kuô̆k hô̆i troh lăm pôu, rơkâu Têt, diâp kơxuô tơmeăm rơpŏng ai hnoăng tơnêi têa, rơpŏng kơtiê, vâi krâ hdroâng kuăn ngo ƀă kŏng nhân pêi cheăng ai tơdroăng rêh ối pá puât tung kong pơlê An Giang.

Hơnăm 2023 châ tối hdrối pơtối ai hên mâu tơdroăng pá puât, pơloăng mơnúa, xua mê, Kăn xiâm hnê ngăn Kuô̆k hô̆i pói vâ Đảng ƀô̆, khu râ kăn pơkuâ, khu mô đô̆i ƀă kuăn pơlê kong pơlê An Giang pơtối mơnhông mơdêk khôi túa lĕm tro pơlê xiâm kăch măng khŏm rơdêi, rŭm môi tuăn ƀă hiêm mơno, tah lôi mâu tơdroăng pá puât, pơloăng mơnúa.

Tơdrêng amê, hbrâ tŭm roh tơ’lêi vâ pêi kêi đeăng mâu pơkâ mơnhông mơdêk. A kố, pôa Vương Đình Huệ ƀă Khu râ kăn pêi cheăng hiăng diâp 200 kơxuô tơmeăm diâp ăm mâu rơpŏng ai hnoăng tơnêi têa, rơpŏng kơtiê, vâi krâ mâu hdroâng kuăn ngo ƀă kŏng nhân pêi cheăng ai tơdroăng rêh ối pá puât tung kong pơlê An Giang; diâp kơxuô tơmeăm Têt ăm kăn ƀô̆, mô đô̆i gâk tơkăng kong kong pơlê An Giang.