VOV4.Xơ Đăng - Klăng hâi hlá tơbeăng kăch măng Việt Nam 21/6, pôa Vương Đình Huệ, Kăn xiâm hnê ngăn Kuô̆k hô̆i hiăng troh lăm pôu, pêi cheăng ƀă Hlá tơbeăng Teăng mâ Kuăn pơlê. Xông tơpui akố, pôa Vương Đình Huệ tối rơdêi, hlá tơbeăng hiăng chêh khât ‘nâng ‘’hiâm dêi tơdroăng rêh ối’’ a hneăng hôp tơpui tơno Kuô̆k hô̆i cho ƀâng vâ mơngế tâ phĭu, kuăn pơlê séa ngăn tơdroăng pêi cheăng dêi Kuô̆k hô̆i tối krê, dêi mâu kơ koan tơnêi têa tối tơdjuôm.

Pôa Vương Đình Huệ mơnhên tung rơxông pêi cheăng xúa kơmăi kơmok, Khu pơkuâ Hlá tơbeăng Teăng mâ kuăn pơlê hiăng đi đo tơmiât pêi rơkê, khŏm kơtăng pơ’lêh nếo tơdroăng xiâm ƀă tơdroăng kal, pơtâng tối, ti tăng plĕng rêm troăng prôk tơtro, kâi trâng rĕng ƀă mâu pơkâ nếo dêi tơdroăng cheăng kâ xúa kơmăi kơmok, pơlê pơla xúa kơmăi kơmok ki tơnêi têa dế tơmiât vâ pêi.

Vâ mơdêk tâ mê nếo châ tơƀrê tơdroăng cheăng ‘na tối tơdroăng kal, pơtâng tối tơdroăng pêi cheăng dêi Kuô̆k hô̆i, Kăn xiâm hnê ngăn Kuô̆k hô̆i pơkâ thế Hlá tơbeăng Teăng mâ kuăn pơlê pêi pro tro tơdroăng pơkâ mơnhông mơdêk, pơkuâ tơtro, mơjiâng tơdroăng môi tuăn tung rêm troăng prôk pêi pro, rak tơniăn tro troăng, tơdroăng pơkuâ dêi Đảng, troăng hơlâ, luât dêi Tơnêi têa.

            A Sa Ly tơplôu ƀă tơbleăng