Iran ƀă Việt Nam ai tơrŭm lĕm tro. Ôh tá xê krê to mâu tơdroăng cheăng dêi Kuô̆k hô̆i, mê roh lăm pôu pêi cheăng kong têa Iran roh kố dêi pôa Vương Đình Huệ ƀă Khu râ kăn teăng mâ râ xiâm Kuô̆k hô̆i tơnêi têa pin ối ai tơdroăng ki kal khât vâ thăm rak tơniăn tơrŭm nhŏng o ƀă tơrŭm ƀă Iran tung tơdroăng ki nếo tung mâu kơvâ kal kí – tơpui kâ ƀă kong têa ê, cheăng kâ, khôi túa lĕm tro, hnê hriâm, khoa hok, kŏng ngê̆ ƀă hía hé.

A roh lăm pôu pêi cheăng kố, pôa Vương Đình Huệ ƀă Khu râ kăn teăng mâ râ xiâm Kuô̆k hô̆i tơnêi têa pin kô ai mâu roh tơpui tơno, trâm mâ, tơdah khu râ kăn râ xiâm dêi Kŏng hoa khôp Islam Iran; veăng Hneăng hôp tơpui tơno ‘na troăng hơlâ, luât thăm mơdêk tơrŭm cheăng kâ, tê mơdró ƀă mơ’no liăn cheăng; Veăng pơxiâm po măng tĭng leh Mơhno khôi túa lĕm tro Việt Nam a Iran leh tơbâ 50 hơnăm mơjiâng tơrŭm cheăng.