Tơbleăng mơgêi a rôh pêi cheăng, pôa Vương Đình Huệ, Kăn xiâm hnê ngăn Kuô̆k hô̆i tối nhên, hlá mơ-éa Luât tơnêi (‘mâi hơ’lêh) hâi lơ 1/8 hiăng châ ‘mâi rơnêu ing xiâm tơkŭm tâi tâng tŭm ƀă tơdah xo tro tiô luât kơtăng, rah nhên tơdroăng hnê tối dêi mâu kăn Kuô̆k hô̆i tung rôh hôp má pơtăm kố nah, tơdroăng veăng hnê tối dêi mâu kơ koan Kuô̆k hô̆i, mâu kơ koan ƀă khu tơrŭm cheăng dêi kơ koan, kuăn pơlê.

Kăn xiâm hnê ngăn Kuô̆k hô̆i xuân khĕn kơdeăn khât, kơ koan pơkuâ rah chêh mâu tơdroăng ƀă Chin phuh hiăng mơ-eăm, tơrŭm ƀă Vi ƀan pơkuâ cheăng kâ ƀă kơ koan Kuô̆k hô̆i ki hiăng’mâi rơnêu môi hvêa prôk nếo cho nhên. Troh nôkố, ki tơƀrê dêi tơdroăng tơkêa bro cho rak tơniăn ƀă dế prôk tro troăng.

Kăn xiâm hnê ngăn Kuô̆k hô̆i pơkâ thế hlá mơ-éa Luât tơnêi (‘mâi hơ’lêh) thế tơniăn tơdâng ƀă mâu luât ki ê tung tơdroăng ‘na luât, malối ƀă mâu tơdroăng tơkêa luât ki Kuô̆k hô̆i dế séa ngăn, pơkâ; ôh tá xúa Luât mê pro hơ’lêh kơvâ cheăng dêi luât ki ê.