Hneăng hôp Kăn Kuô̆k hô̆i hơnăm ối nếo lâp plâi tơnêi roh má 9 a Hà Nội kô tơkŭm po sap hâi lơ 14 – 18/9/2023 ƀă dó inâi ‘’Hnoăng dêi khu hơnăm ối nếo tung tơdroăng mơdêk pêi pro mâu Pơkâ xiâm mơnhông krá tơniăn ing pơ’lêh pêi cheăng xúa kơmăi kơmok ƀă pơ’lêh nếo tơmiât pêi rơkê’’.

Troh nôkố, hiăng ai 64 khu kĭ veăng Hneăng hôp, ƀă 244 ngế. Kố cho tơdroăng tơpui kâ ƀă kong têa ê hên pâ drêng kố tê xua Kuô̆k hô̆i Việt Nam tơkŭm po tung hơnăm kố. Pôa Vương Đình Huệ pơkâ thế mâu tiêuh ƀan, Khu tơkŭm po hriăn plĕng, tơmâng xo mâu rơkong tơpui a roh hôp kêi đeăng tơdroăng hbrâ; kêi đeăng mâu tơdroăng vâ po i nhên rêm tơdroăng kal, rêm roh hôp; séa ngăn nhên rêm tơdroăng xiâm; kal ai troăng hbrâ ăm rêm tơdroăng vâ ví ki ôh tá ‘nâi pro ti lâi.

‘Na tiêuh ƀan pêi tơdroăng xiâm, kal ai tơdroăng hbrâ nhên, bro nhên, ‘nâng ‘nâi. Tơdroăng tơniăn gâk kring, tơniăn krúa lĕm kế kâ kal châ tơniăn tiô tro pơkâ.