Mâu kăn teăng mâ pơtối tơpui tơno, pơkâ thế pêi pro nhên mâu troăng pêi ăm 8 tơdroăng tơkêa bro BOT; pơkâ thế ôh tá xua mâu pơkâ pro troăng kân ăm phêp rơxế kơtâu têi lơ ôh tá bê liăn mê pro tơdjâk ăm kuăn pơlê. Roh kơ-êng xuân tơpui hên mâu troăng rak tơniăn tơdroăng pơkâ pêi ki lôi ton, tơdroăng tơkêa bro lối ton ƀă mâu pơkâ cheăng kâ kih thuât ‘na gô̆m, pơto ƀă tíu hvât sok.

Mơgêi ƀă tơdroăng kơ-êng kơvâ cheăng kâ krâ kơvâ, Kăn xiâm hnê ngăn Kuô̆k hô̆i tối ăm ‘nâi tung roh kơ-êng kơxo hiăng ai 41 kăn teăng mâ hiăng châ kơ-êng ƀă tơtŭng. Xuân ối 46 kăn teăng mâ kĭ kơ-êng ƀă 2 kăn teăng mâ tơtŭng, Kăn xiâm hnê ngăn Kuô̆k hô̆i pơkâ thế mâu kăn teăng mâ pơtroh mâu rơkong kơ-êng ƀă tơtŭng troh mâu ngế xiâm, kăn pơkuâ kơvâ vâ châ tiâ ƀă mơ-éa.