Pôa Vương Đình Huệ, Kăn xiâm hnê ngăn Kuô̆k hô̆i tối phiu ro tơdah rơkong krếo thế dêi jâ Puan Maharani, Kăn xiâm hnê ngăn Kuô̆k hô̆i râ má péa troh lăm pôu pêi cheăng a kong têa Indonesia, veăng Hneăng hôp Khu râ kăn Kuô̆k hô̆i râ má péa mâu kong têa peăng mâ hâi lo pá hdroh châu Á roh má 44 (AIPA – 44), lăm pôu pêi cheăng a pơlê kong kân Jakarta lĕm ro.

Tối mơnhên tơrŭm cheăng pơla péa tơnêi têa dế mơnhông mơdêk lĕm, Kăn xiâm hnê ngăn Kuô̆k hô̆i mơnhên roh lăm pôu pêi cheăng cho vâ thăm mơdêk tơrŭm cheăng pơla péa tơnêi têa tung tâi tâng mâu mâu râ, tá Đảng, Kuô̆k hô̆i râ má môi, Chin phuh, kong pơlê ƀă trâm mâ pơla kuăn pơlê.

Kăn xiâm hnê ngăn Kuô̆k hô̆i tối ăm ‘nâi, kố cho roh lăm pôu pêi cheăng kong têa Indonesia apoăng drêng to pro Kăn xiâm hnê ngăn Kuô̆k hô̆i, tối hâk phiu tơdroăng mơnhông dêi pơlê kong xiâm Jakarta – tíu kơdrâm kuăn pơlê rêh ối pêi cheăng kân má môi, pơ’leăng mâ mơngế bu châ 3% laga veăng kum troh 20% ăm GDP dêi lâp tơnêi têa Indonesia.

Kăn xiâm hnê ngăn Kuô̆k hô̆i pói vâ pơlê kong xiâm péa tơnêi têa tơrŭm, tối ăm dêi pó túa ki rơkê tơtro mơnhông, ki má lối cho drêng pơla Hà Nội ƀă Jakarta tiô tối hdrối kô rĕng ai troăng tơƀai kơneăng.