Pôa Vương Đình Huệ, Kăn xiâm hnê ngăn Kuô̆k hô̆i phiu ro pôa Park Hark-kyu troh lăm pôu ƀă pêi cheăng a Việt Nam ƀă phiu ro vêh trâm klêi kơ’nâi roh lăm pôu pêi cheăng păng ‘nâng kong têa Hàn Quốc dêi Khu râ kăn teăng mâ Kuô̆k hô̆i Việt Nam a khế 2/2021.

Pôa Vương Đình Huệ mơnhên tối, Kuô̆k hô̆i Việt Nam môi tuăn, hbrâ rơnáu mơjiâng luât tơ’lêi hlâu ăm mâu tơdroăng mơ’no liăn cheăng, pêt mơjiâng tơmeăm, tê mơdró dêi pơlê pơla khu tê mơdró tung tơnêi têa ƀă kong têa ê, tung mê, ai mâu khu tê mơdró Hàn Quốc ƀă Grup Samsung; kô rơtế ƀă pro tơ’lêi hlâu vâ Grup pêi pro mâu tơdroăng mơ’no liăn cheăng tê mơdró châ tơƀrê ƀă krá tơniăn a Việt Nam.

Kăn xiâm pơkuâ Grup Samsung Electronics Park Hark-kyu pói vâ Việt Nam kô pơtối rak tơniăn tíu tê mơdró tung la ngiâ. Klăng roh kố, pôa Park Hark-kyu tơpui tơno ƀă pôa Vương Đình Huệ ‘na mâu tơdroăng rơhêng vâ ‘nêi plĕng dêi grup.