Akố, Kăn xiâm hnê ngăn Kuô̆k hô̆i hiăng tơdah kăn pơkuâ pơlê kong kân Burgas Dimitar Nikolov ƀă mâu kăn phŏ pơkuâ pơlê kong kân, kăn pơkuâ mâu Khu dêi Pơlê kong kân. Kăn xiâm hnê ngăn Kuô̆k hô̆i tối nhên, tung lối 73 hơnăm hdrối, Việt Nam đi đo mơnê tơdroăng tŏng kum dêi Bulgaria tối tơdjuôm ƀă dêi Pơlê kong kân Burgas tối krê.

Tung rôh lăm pôu păng ‘nâng rôh kố, a mâu rôh tơpui tơno ƀă kăn xiâm hnê ngăn Kuô̆k hô̆i, kăn xiâm pơkuâ kong têa ƀă Ngế pro xiâm hnê ngăn kong têa rơtế ƀă mâu rôh trâm mâ ki ê, péa pâ pơrá môi tuăn mơdêk tơrŭm cheăng, tơrŭm tung tâi tâng mâu kơvâ cheăng Đảng, Chin phuh, Kuŏk hô̆i, trâm mâ kuăn pơlê pơla kuăn pơlê, kong pơlê pơla kong pơlê.

Kăn xiâm hnê ngăn Kuô̆k hô̆i hiăng tối ăm kăn pơkuâ pơlê kong kân Burgas ‘na kong pơlê Quảng Ninh nôkố, kố cho môi tung mâu kong pơlê ki mơnhông mơdêk rĕng má môi dêi Việt Nam; ăm ‘nâi, klêi rôh lăm pôu kố kô hnê mơhno kong pơlê Quảng Ninh rĕng po mâu tơdroăng cheăng pơla péa pâ; tơdrêng amê hlối pơkâ thế kăn pơkuâ pơlê kong kân ƀă mâu ngế cheăng tung pơlê kong kân lăm pôu Việt Nam, pôu kong pơlê Quảng Ninh vâ mơdêk tơrŭm cheăng pơla péa kong pơlê, malối cho tung kơvâ ôm hyô.