.VOV4.Xơ Đăng - Kơxê măng lơ 14/6, pôa Vương Đình Huệ, kăn xiâm hnê ngăn Kuô̆k hô̆i hiăng tơdah kăn teăng mâ New Zealand – jâ Tredene Cherie Dobson. Kăn xiâm hnê ngăn Kuô̆k hô̆i tối, phiu ro hlo mâu tơdroăng ki mơdêk tung tơrŭm cheăng la ngiâ Việt Nam - New Zealand tung pơla hdrối nah. Drêng kố, pôa Vương Đình Huệ, kăn xiâm hnê ngăn Kuô̆k hô̆i mơnê Chin phuh New Zealand tung pơla xơpá má môi hiăng kum ăm Việt Nam tung hnoăng cheăng hbrâ mơdât pơreăng COVID-19 ƀă tá hneăng hơnăm ki ‘mâi mơnhông, mơdêk cheăng kâ.

Pôa Vương Đình Huệ, kăn xiâm hnê ngăn Kuô̆k hô̆i tơdah kăn teăng New Zealand

Kuô̆k hô̆i Việt Nam mơnê Chin phuh, kuăn pơlê New Zealand đi đo tơmâng ngăn ƀă kum liăn kơnía git tŏng kum liăn ODA vâ Việt Nam pêi pro mâu tơdroăng pơkâ mơnhông mơdêk cheăng kâ krá tơniăn, tơkŭm tung mâu kơvâ cheăng ki New Zealand ai ivá rơdêi ƀă Việt Nam ai tơdroăng ki rơhêng vâ pêi chiâk deăng, mơnhông thôn pơlê, hnê hriâm, mơnhông tơ’nôm mâu kơxô̆ liăn, rak ngăn ƀă hbrâ ví khía mơhot têa kan lân lu, kong prâi hơ’lêh ƀă kơdroh kơtiê.

Katarina Nga tơplôu ƀă tơbleăng