Pôa Vương Đình Huệ, Kăn xiâm hnê ngăn Kuô̆k hô̆i tối, tung luât tơpui kâ dêi Việt Nam đi đo mơdêk tơrŭm cheăng ƀă Nhuk; púi vâ péa pâ mơdêk tung tâi tâng ƀâng dêi Đảng, Chin phuh, Kuô̆k hô̆i, trâm tơpui tơno ƀă kuăn pơlê, tơrŭm pơla khu mơdró ƀă khu mơdró, kong pơlê ƀă kong pơlê.

Péa pâ kăn xiâm xuân tối, péa pâ kal mơdêk tơpui tơno tơrá mâu kăn xiâm, rêm râ, khu kăn Kuô̆k hô̆i vâ rơtế tối ăm dêi rơpó ‘nâi mâu tơdroăng cheăng, tung mê, ai kơvâ cheăng ‘na luât, séa ngăn ƀă pơkâ mâu tơdroăng ki kal dêi tơnêi têa. Péa pâ rơtế tối, Việt Nam ƀă Nhuk xuăn mơ-eăm ƀă môi tuăn troăng rơhlâ, troăng rơhlâ pêi pro tung tơdroăng pơtối rak vế hơniâp lĕm, tơniăn, tơleăng mơnhên tơbriât dêi rơpó a têa kơxĭ Biển Đông ƀă tơdroăng hơniâp lĕm, tơtro ƀă luât lâp plâi tơnêi, tung mê, ai Tơdroăng tơhrâ dêi khu lâp plâi tơnêi ‘na Luât têa kơxĭ hơnăm 1982.