VOV4. Xơ Đăng - Kơxê lơ 26/4, a Hngêi Kuô̆k hô̆i, pôa Vương Đình Huệ, kăn xiâm hnê ngăn Kuô̆k hô̆i hiăng tơdah jâ Pany Yathotou, ngế tung tíu xiâm tơdroăng kal kí Đảng Nhân dân Kăch măng Lếo, kăn xiâm phŏ hnê ngăn kong têa Lếo dế pôu Việt Nam.

Mơnhên tối klêi kơ’nâi tơpui tơno pơla kăn xiâm phŏ hnê ngăn kong têa Lếo po a kơxo rơtế tung hâi, pôa Vương Đình Huệ, kăn xiâm hnê ngăn Kuô̆k hô̆i tối nhên, Kuô̆k hô̆i Việt Nam hbrâ rơnáu séa ngăn ƀă tŏng kum mâu tơdroăng ki tơvâ tơvân ‘na tơdroăng ki vâ pro tơ’lêi ăm khu mơdró kâ péa pâ tơrŭm tơƀrê tâ nếo, veăng kum mơdêk kơxô̆ liăn pêi lo ing tê mơdró pơla Việt Nam – Lếo, xuân môi tiah tơrŭm cheăng kâ, tê mơdró, ‘no liăn cheăng péa tơnêi têa mơnhông, kum mơdêk tơdroăng rêh ối kuăn pơlê. Rơtế amê, Kuô̆k hô̆i Việt Nam kum tơdroăng ki mơdêk hnê sinh viên Lếo xuân môi tiah hnê ‘na tơdroăng ki rơkê pơla kăn ƀô̆ mâu kơ koan tơrŭm cheăng péa tơnêi têa.

Katarina Nga tơplôu ƀă tơbleăng