Pôa Vương Đình Huệ ai tối tiah kố, Việt Nam prế Algeria cho 2 to kong têa pú hmâ hiăng tơrŭm dêi pó sap ing ton hdrối nah. Việt Nam prôk tiô troăng ki tơrŭm nhŏng o la xuân pơtối rak vế dêi tơdroăng tơniăn krê, mơhnŏng pơkuâ rak ngăn dêi xêh, hơniâp lĕm, nhŏng o, tơrŭm ƀă mơnhông. A hneăng tơdah mê, péa ngế kăn hiăng môi tuăn pơkâ tối, maluâ Việt Nam prế Algeria kơtăn hơngế dêi pó ‘na tơnêi kong kế, la ai tơdroăng ki tơrŭm ki achê, hmâ môi tiah nhŏng o. Mâu khế hơnăm la ngiâ, péa to kong têa kal thăm mơdêk tơrŭm cheăng ‘na pêi cheăng kâ, ‘na tê mơdró.

Kăn xiâm phŏ hnê ngăn Kuô̆k hô̆i kong têa Algeria vêh mơnhên tối, Algeria hbrâ ăm tơdroăng ki vâ pro tíu ki tơdjêp, pro troăng hơlâ ki vâ Việt Nam châ mơ’no tê mơdró dêi kế tơmeăm a kơpong châu Phi. Pôa Vương Đình Huệ mơnhên tối, Việt Nam hbrâ vâ pro tiú ki xiâm, vâ ai troăng hơlâ vâ kong têa Algeria châ mơ’no tê mơdró dêi kế tơmeăm troh tung kơpong ASEAN. Pôa Monder Bouden, Kăn xiâm phŏ ngăn Kuô̆k hô̆i kong têa Algeria hiăng hâk kơdeăn ‘ló hôm khât Hneăng tơpui “Thăm mơdêk ivá cheăng chal rơxông kơmăi kơmok xúa kơxô̆ ki nếo ăm khu droh rơtăm”, hâi Leh hiăng pơxiâm po, Roh hôp tâi tâng khu kăn Kuô̆k hô̆i hơnăm ối nếo lâp plâi tơnêi roh má 9, mê khu kăn Kuô̆k hô̆i hơnăm ối nếo dêi Algeria hiăng ai hên tơdroăng ki pêi pro kơhnâ khât ăm ‘na mâu hnoăng cheăng kố.