A rôh tơdah, pôa Vương Đình Huệ, Kăn xiâm hnê ngăn Kuô̆k hô̆i  hiăng tối mâu tơdroăng ăm Ngế xiâm pơkuâ Vi ƀan Tơpui kâ dêi Kuô̆k hô̆i ‘na tơdroăng mơjiâng khu Kăn kuô̆k hô̆i pơlê Việt Nam – Bangladesh; pâ thế Vi ƀan Tơpui kâ dêi Kuô̆k hô̆i Việt Nam ƀă Bangladesh cho tíu tơdjêp ki kal vâ mơnhông tơrŭm cheăng tung tâi tâng mâu ƀâng dêi péa tơnêi têa, malối tơdroăng ‘no hnoăng mơnhông mơdêk tơbleăng pêi tơƀrê mâu tơhrâ ƀă mâu tơdroăng chêh tơrŭm cheăng ki hiăng châ kĭ.

Kăn xiâm hnê ngăn Kuô̆k hô̆i púi vâ tung la ngiâ kô ai hên khu kăn Kuô̆k hô̆i lo ing mâu Vi ƀan dêi Kuô̆k hô̆i Bangladesh, mâu kăn Kuô̆k hô̆i kơdrâi, mâu kăn Kuô̆k hô̆i hơnăm ối nếo troh Việt Nam vâ mơdêk trâm mâ, hriâm túa pêi cheăng, hlối pro xiâm mơnhông tơrŭm cheăng péa tơnêi têa.