A Hngêi Kuô̆k hô̆i, pôa Vương Đình Huệ, Kăn xiâm hnê ngăn Kuô̆k hô̆i ai rôh tơpui păng ‘nâng ƀă jâ Stéphanie D’Hose, kăn xiâm hnê ngăn Kuô̆k hô̆i râ má môi Ƀih. Péa ngế kăn xiâm hnê ngăn Kuô̆k hô̆i mơnhên tối khât mâu tơdroăng ki hlo tơƀrê tung tơrŭm cheăng kâ pơla péa tơnêi têa tung pơla hdrối nah.

Pôa Vương Đình Huệ, Kăn xiâm hnê ngăn Kuŏk hô̆i tơnêi têa pin tối tiah kố, ki ai hlâu tung tơrŭm cheăng pơla péa tơnêi têa ‘na tê mơdró – ‘no liăn cheăng ối hên. Tung tơdroăng mâu kong têa dế mơdêk tơdroăng ki ‘no liăn cheăng, péa tơnêi têa kal pơtối tơrŭm tối tơbleăng mâu tơdroăng dế ai nôkố ƀă mơjiâng mâu tơdroăng tê mơdró ki nếo.

Kăn xiâm hnê ngăn Kuô̆k hô̆i pơkâ thế, Ƀih bro tơ’lêi ăm kế tơmeăm tê ngi kong têa ê dêi Việt Nam pơtối châ tê a kong têa Ƀih ƀă EU, malối cho ká xi xŏng, kế tơmeăm pêi lo ing chiâk deăng tiah hmâ dêi Việt Nam môi tiah phái, kơphế ƀă hên ki ê. Tối nhên, hơ’lêh kơxô̆ ƀă hơ’lêh on tơhrik cho 2 tơdroăng cheăng hơ’lêh kal khât tung lâp plâi tơnêi ƀă Ƀih cho kong têa ki mơnhông tung 2 kơvâ cheăng kố, pôa Vương Đình Huệ, Kăn xiâm hnê ngăn Kuô̆k hô̆i rơhêng vâ Kuô̆k hô̆i Ƀih hnê ăm mâu tơdroăng ki rơkê mơjiâng troăng hơlâ ăm Kuô̆k hô̆i Việt Nam.