VOV4.Xơ Đăng - A tíu pêi cheăng Hngêi Kuô̆k hô̆i kong têa Ăng-glê, pôa Vương Đình Huệ, Kăn xiâm hnê ngăn Kuô̆k hô̆i hiăng tơpui tơno ƀă pôa John Mcfall, Kăn xiâm hnê ngăn Kuô̆k hô̆i râ má môi kong têa Ăng-glê. A hneăng hôp tơpui tơno, Péa ngế kăn xiâm phiu ro hlo, Việt Nam ƀă Ăng-glê hiăng tơrŭm krá tơniăn a mâu troăng pơkâ pêi rêm pâ môi tiah Khu lâp kong têa, Hneăng hôp tơpui tơno tơrŭm cheăng châu Á – Âu (ASEM) ƀă tơdroăng tơrŭm cheăng ASEAN – Ăng-glê, Việt Nam đi đo môi tuăn Ăng-glê thăm mơnhông tơrŭm cheăng ƀă ASEAN ƀă Ăng-glê môi tuăn hnoăng tíu xiâm dêi ASEAN ƀă cho kông tơdjêp ki kal pơla Việt Nam ƀă EU.

Pôa Vương Đình Huệ, Kăn xiâm hnê ngăn Kuô̆k hô̆i tơpui ƀă Kăn xiâm hnê ngăn Kuô̆k hô̆i râ má môi kong têa Ăng-glê

Péa pâ môi tuăn pơtối thăm tơpui tơno Khu râ kăn pơkuâ, mâu Kơ koan dêi Kuô̆k hô̆i, Khu Kăn xiâm Kuô̆k hô̆i tuăn pâ ƀă mâu kăn Kuô̆k hô̆i râ má môi; tơpui tơno túa ki rơkê tơtro tơdroăng pêi cheăng Kuô̆k hô̆i râ má môi dêi rêm kong têa; thăm tơrŭm séa ngăn ƀă mơhnhôk pêi pro mâu Tơdroăng môi tuăn tơrŭm ki Chin phuh péa tơnêi têa hiăng kĭ tơkêa, mâu tơdroăng tơrŭm cheăng ton xŏn; môi tuăn Chin phuh, kong pơlê, khu tê mơdró ƀă kuăn pơlê péa tơnêi têa thăm trâm mâ tơpui tơno, thăm tơrŭm hlê plĕng dêi pó ƀă tơrŭm péa pâ ai pơxúa.