Tung rôh lăm pôu pêi cheăng păng ‘nâng a Indonesia, kơxê hâi lơ 7/8, pôa Vương Đình Huệ, Kăn xiâm hnê ngăn Kuô̆k hô̆i hiăng ai rôh tơpui tơno ƀă pôa Joko Widodo, Kăn xiâm pơkuâ kong têa Indonesia.

 Pôa Vương Đình Huệ, Kăn xiâm hnê ngăn Kuô̆k hô̆i tối rơdêi Việt Nam ngăn nhuô̆m khât tơrŭm kong têa tung la ngiâ ƀă Indonesia; tối tơbleăng ăm pôa Joko Widodo klêi kơ’nâi rôh lăm pôu păng ‘nâng Indonesia ƀă veăng hôp a Hneăng hôp kân AIPA-44, ăm ‘nâi Kuô̆k hô̆i péa tơnêi têa hiăng kĭ tơkêa tơrŭm vâ mơdêk tâ nếo tơrŭm cheăng Kuô̆k hô̆i, veăng kum pro pơxúa mơdêk tơrŭm cheăng pơla péa tơnêi têa, rơhêng vâ mơdêk tơrŭm cheăng pơla péa tơnêi têa tâk troh a hneăng ki nếo.

Kăn xiâm pơkuâ kong têa Indonesia môi tuăn ƀă Kăn xiâm hnê ngăn Kuô̆k hô̆i ‘na tơdroăng ki péa pâ mơdêk rak vế mâu tơdroăng ki tŏng kum dế ai nôkố, mơdêk tơrŭm cheăng tung kơvâ cheăng têa kơxĭ, ká xi xŏng ƀă mâu kơvâ cheăng ki nếo môi tiah hơ’lêh kơxô̆, hơ’lêh on tơhrik tơdâng tơ’mô.