A rôh tơpui, pôa Vương Đình Huệ, Kăn xiâm hnê ngăn Kuô̆k hô̆i rơkâu Bangladesh ‘na tơdroăng cheăng hiăng châ pêi pro a chê kố; malối, GDP tâk luâ 7% tung hơnăm liăn ngân 2021-2022, Bangladesh hiăng chiâng kong têa tê hên kế tơmeămăm kong têa ê ki má 2 tung lâp plâi tơnêi ‘na mâu tơmeăm pơchoh hmân ếo ƀă mâu túa pêi cheăng djâ troăng a hdrối tung mơjiâng mâu hngêi kơmăi ki dâi lĕm.

Kăn xiâm hnê ngăn Kuô̆k hô̆i xuân rơkâu Bangladesh tơkŭm po rah xo kăn tung la ngiâ, pêi tơƀrê “Hvái ngăn tơdroăng cheăng vâ pêi hơnăm 2041 drêng “mơnhông djâ Bangladesh chiâng kong têa rơkê má môi ƀă rơkê khât a hơnăm 2041 drêng troh leh tơbâ 70 hơnăm mơjiâng kong têa. Péa ngế kăn xiâm tối nhoăm tơdroăng tơrŭm cheăng tiah hmâ sap ton nah pơla Việt Nam -Bangladesh; hiăng tơpui ƀă vâ môi tuăn mâu troăng pêi ki kân mơnhông djâ tơrŭm cheăng péa tơnêi têa rế xông tơƀrê tâ nếo.

Kơxê hâi lơ 21/9, a tíu pêi cheăng Tơpui kâ dêi Bangladesh, pôa Vương Đình Huệ, Kăn xiâm hnê ngăn Kuô̆k hô̆i; Kăn xiâm tơpui kâ Bangladesh, pôa Nguyễn Mạnh Cường, Kăn teăng mâ Việt Nam a Bangladesh hiăng pôe ché pơxiâm po leh tơbleăng um 50 hơnăm tơrŭm cheăng tiah hmâ ƀă tơrŭm cheăng pơla Việt Nam- Bangladesh xua Thŏng tâ̆n xah Việt Nam tơkŭm po.