VOV4.Xơ Đăng - Tiô rơkong krếo thế dêi pôa Vương Đình Huệ, Kăn xiâm hnê ngăn Kuô̆k hô̆i , Kăn xiâm hnê ngăn Kuô̆k hô̆i kong têa Kŏng hoa Mozambique pơkuâ xiâm Khu râ kăn teăng mâ Kuô̆k hô̆i kong têa Kŏng hoa Mozambique lăm pôu pêi cheăng a tơnêi têa Việt Nam sap hâi lơ 18 – 23/6. Leh tơdah păng ‘nâng dêi Kăn xiâm hnê ngăn Kuô̆k hô̆i kong têa Mozambique tơkŭm po kân krip a Hngêi Kuô̆k hô̆i a kơxo lơ 20/6, ƀă tơdroăng pơkuâ dêi pôa Vương Đình Huệ. Klêi kơ’nâi leh tơdah  hiăng tơkŭm po Hneăng hôp tơpui tơno pơla Khu râ kăn xiâm Kuô̆k hô̆i péa tơnêi têa.

Pôa Vương Đình Huệ, Kăn xiâm hnê ngăn Kuô̆k hô̆i tơpui tơno ƀă Kăn xiâm hnê ngăn Kuô̆k hô̆i Mozambique

A hneăng hôp tơpui tơno, Kăn xiâm hnê ngăn Kuô̆k hô̆i mơnhên Việt Nam nhuô̆m khât tơrŭm cheăng tiô khôi vâi krâ nah ƀă kong têa Mozambique; cho kong têa kal kơjo thăm tơrŭm kal kí, tơpui kâ ƀă kong têa ê ƀă tơrŭm cheăng kâ a châu Phi tung hneăng nôkố. Péa ngế Kăn xiâm hnê ngăn Kuô̆k hô̆i loi tơngah Mơ-éa chôu vế ‘na tơrŭm cheăng pơla Kuô̆k hô̆i Việt Nam ƀă Kuô̆k hô̆i kong têa Mozambique châ kĭ a roh lăm pôu pêi cheăng păng ‘nâng kố kô tơdjêp péa Kuô̆k hô̆i achê tâ, chiâng tơrŭm ki păng ‘nâng pơla Kuô̆k hô̆i péa tơnêi têa; kố cho xiâm rêi luât ki kal vâ Kuô̆k hô̆i péa tơnêi têa đi đo thăm pro tơniăn ƀă thăm tơrŭm cheăng tung la ngiâ.

            A Sa Ly tơplôu ƀă tơbleăng