VOV4.Xơ đăng - Kơxo lơ 18/5, a Hngêi Kuô̆k hô̆i, pôa Vương Đình Huệ, Kăn xiâm hnê ngăn Kuô̆k hô̆i hiăng tơpui tơno ƀă kăn xiâm pơkuâ kong têa Greco. Pôa Vương Đình Huệ phiu ro drêng hlo tơrŭm tơroâ ƀă tơrŭm cheăng hên kơvâ pơla péa tơnêi têa tung pơla hdrối nah ôh tá la lâi pơtê tơdroăng ki ‘mâi mơnhông ƀă mơdêk tơniăn lĕm, mơhno tối ing tơdroăng ki pơtroh mâu kăn xiâm, malối cho pơla kăn pơkuâ khu râ kăn xiâm péa tơnêi têa.

Pôa Vương Đình Huệ, Kăn xiâm hnê ngăn Kuô̆k hô̆i tơpui tơno ƀă kăn xiâm pơkuâ kong têa Greco

Tơrŭm cheăng kâ rêh ối pơlê pơla tê mơdró mơnhông mơdêk tơniăn, malối cho sap ing Khu tơrŭm cheăng EVFTA châ tơbleăng. Kăn xiâm hnê ngăn Kuô̆k hô̆i pơkâ thế, péa tơnêi têa pơtối mơdêk tơrŭm tung mâu kơvâ cheăng ki Greco ai ivá rơdêi ƀă Việt Nam ai tơdroăng ki rơhêng vâ môi tiah cheăng kâ têa kơxĭ, pro tuk, kơno tuk ôm hyô, tơdrêng amê hlối rĕng môi tuăn, kĭ tơkêa ví tơdroăng ki nâp hnoăng liăn mơhá 2 hdroh ƀă tơkêa pơto chơ tơmeăm a têa kơxĭ vâ pro tơ’lêi hlâu ăm tơdroăng cheăng kâ, tê mơdró pơla péa pâ.

Katarina Nga tơplôu ƀă tơbleăng