VOV4.Xơ Đăng - Pơtối tơdroăng pêi cheăng tung roh lăm pôu pêi cheăng kong têa Ăng-glê, kơxê lơ 29/6, tiô chôu kong têa mê, a pơlê kong xiâm London, pôa Vương Đình Huệ, Kăn xiâm hnê ngăn Kuô̆k hô̆i hiăng trâm mâ pôa Peter Estlin, kăn pơkuâ hnê ngăn tơdroăng tơnêi têa pơlê kong xiâm London. A roh trâm mâ, pôa Vương Đình Huệ tối nhên, hnoăng dêi Tíu xiâm pơkuâ tơdroăng tơnêi têa London cho môi tung pŭn tíu xiâm pơkuâ tơdroăng tơnêi têa kân má môi lâp plâi tơnêi, hên khu tơrŭm ‘na hngêi arak liăn Ăng-glê môi tiah Prudential, HSBC, Standard Chartered ƀă hía hé hiăng pêi cheăng châ tơƀrê a Việt Nam tung mâu hơnăm hiăng hluâ.

Kăn xiâm hnê ngăn Kuô̆k hô̆i pơkâ thế peăng pú hmâ tŏng kum Việt Nam ‘na luât tung kơvâ liăn ngân, hngêi arak liăn, kơmăi châm điêm mâu kŏng ti ƀă khu tê mơdró. Péa pâ rơtế tối pói vâ, tung la ngiâ, mâu tơdroăng tơrŭm mâu râ, mơjiâng pơkâ pêi, luât, ối tung khu ki ăm mung liăn, mơdêk tơdroăng ‘na liăn ngân dêi mâu khu tê mơdró, thăm pro rơdêi tơrŭm cheăng tê mơdró pơla Ăng-glê ƀă Việt Nam mơnhông mơdêk lĕm.

A Sa Ly tơplôu ƀă tơbleăng