Péa kăn xiâm pơkuâ phiu ro hlo tơdroăng tơrŭm cheăng nhŏng o ƀă tơrŭm lĕm tro pơla péa tơnêi têa đi đo krá tâ ƀă mơnhông. Tơrŭm cheăng kâ mot trâu hơngế ƀă tơdroăng kong têa Siam cho khu tơrŭm tê mơdró kân má môi dêi Việt Nam tung ASEAN ƀă cho khu mơ’no liăn cheăng kân má péa tung ASEAN.

Hơnăm 2023, péa tơnêi têa leh tơbâ 10 hơnăm mơjiâng tơrŭm cheăng ton xŏn, Kăn xiâm hnê ngăn Kuô̆k hô̆i pơkâ thế mâu kơ koan dêi péa tơnêi têa thăm tơrŭm, mơdêk pêi pro troăng tơmiât pêi rơkê ‘’Pái tơdjêp’’, tá tơdjêp tơdroăng mơjiâng pro kal vâ; tơdjêp cheăng kâ, khu tê mơdró ƀă kong pơlê; tơdjêp mâu troăng pêi cheăng ton xŏn tơtêk krá tơniăn, mơ-eăm rĕng châ pơkâ pêi lo liăn tê mơdró pơla péa pâ tâk 25 rơtal dollars.

Kăn xiâm hnê ngăn Kuô̆k hô̆i kong têa Siam pơtối pro tơ’lêi hlâu ăm mơngế Việt Nam rêh ối pêi cheăng a kong têa Siam ƀă môi tuăn mơnhông mơdêk khôi túa lĕm tro Việt Nam a kong têa Siam pro xiâm kối vâ mơdêk ó rơdêi trâm mâ tơpui tơno pơla kuăn pơlê péa tơnêi têa.