Rôh hôp Hô̆i đong AIPA má 44 a Jakarta, Indonesia, pôa Vương Đình Huệ, Kăn xiâm hnê ngăn Kuô̆k hô̆i hiăng ai rôh trâm pôa Ferdinand Martin Romualdez, Kăn xiâm hnê ngăn Kuô̆k hô̆i râ má péa Philippines. A rôh trâm, Pôa Vương Đình Huệ phiu ro drêng hlo mâu tơdroăng ki mơnhông rơdêi tung mâu kơvâ cheăng dêi tơrŭm kong têa tung la ngiâ Việt Nam – Philippines, malối cho trâm mâ pơla khu râ kăn xiâm.

 Kăn xiâm hnê ngăn Kuô̆k hô̆i pơkâ thế Việt Nam prếi Philippines kal tơrŭm vâ mơnhông tơdroăng ki tê mơdró, bro tơ’lêi hlâu ăm tơdroăng ki roê xo kế tơmeăm xiâm dêi Việt Nam, tung mê ai phái, kế tơmeăm vâ mơjiâng bro ƀă kế tơmeăm Philippines ai hlâu ƀă Việt Nam rơhêng vâ roê. Péa pâ xuân hiăng môi tuăn tơrŭm tung péa kơvâ cheăng ki kal cho hơ’lêh kơxô̆ ƀă hơ’lêh on tơhrik.