Tối nhên châu Âu cho khu tơrŭm cheăng kal khât dêi Việt Nam, Kăn xiâm hnê ngăn Kuô̆k hô̆i púi vâ mâu Kăn teăng mâ ƀă kăn ƀô̆, mâu ngế pêi cheăng a Tíu pêi cheăng teăng mâ  a mâu kong têa pơtối  rak vế pêi pro tro tŭm tơdroăng, trâu rơdâ tro tiô Pơkâ Hneăng hôp kân má 13 dêi Đảng ƀă tơdroăng dêi Hneăng hôp tơpui tơno tung lâp tơnêi têa ƀă mâu tơdroăng chêh ki ai tơdjâk troh tơpui kâ.

‘Na kal kí tơpui kâ, kal thế pơtối rak vế pêi pro tro tơdroăng tơrŭm tiah hmâ ki lĕm tro vâ mơdêk loi nhoăm tơdroăng kal kí ing tơdroăng mơdêk tơpui tơno pơla mâu kăn rêm râ, kơvâ cheăng tung tâi tâng mâu ƀâng. Kăn xiâm hnê ngăn Kuô̆k hô̆i pơkâ thế mâu Kăn teăng mâ tơmâng khât tơdroăng tơpui kâ ‘na cheăng kâ, hnan thế mơdêk mâu kong têa ki u ối rĕng kĭ tơhrâ rak Tơniăn ‘no liăn cheăng  pơla Việt Nam - EU vâ pro tơ’lêi hlâu ăm mâu tơdroăng ‘no liăn cheăng, pro pơxúa ăm tŭm péa pâ.