A roh trâm mâ tơpui tơno, pôa Vương Đình Huệ, Kăn xiâm hnê ngăn Kuô̆k hô̆i mơnhên Việt Nam đi đo tơmâng, séa ngăn ƀă phiu ro mâu tơdroăng châ tơƀrê lĕm ki Bulgaria hiăng châ tơƀrê tung roh mơnhông cheăng kâ – rêh ối pơlê pơla tung pơla kố nah, kum mơdêk ƀă mơdêk tíu cheăng dêi Bulgaria a tung lâp plâi tơnêi.

Péa pâ môi tuăn rĕng tơkŭm po Hneăng hôp 24 Vi ƀan tơrŭm Chin phuh Việt Nam – Bulgaria tung hơnăm 2023 vâ séa ngăn, môi tuăn mâu troăng pêi ki nhên vâ mơdêk tơrŭm cheăng kâ – tê mơdró – mơ’no liăn cheăng pơla péa tơnêi têa. Tơpui tơno ‘na mâu tơdroăng kơpong ƀă lâp plâi tơnêi, péa kăn xiâm pơkuâ môi tuăn thăm mơdêk tơrŭm cheăng krá tơniăn ƀă tơrŭm tung mâu hneăng tơpui tơno hên troăng ƀă kơpong, ki má lối cho a Khu lâp kong têa, ASEM, ASEAN-EU.