VOV4.Xơ Đăng - Kong măng lơ 13/5, a Plông kân Hngêi hơdruê Pơlê kong kân Hải Phòng, po mơdĭng reăng phươ̆ng khêi – Hải Phòng 2022, tơbâ 67 hơnăm Hâi tơleăng lĕm Hải Phòng. Pôa Vương Đình Huệ, kăn xiâm hnê ngăn Kuô̆k hô̆i veăng a rôh leh. Tơpui pơxiâm po rôh mơdĭng, kăn xiâm hnê ngăn Vi ƀan pơlê kong kân Hải Phòng cho pôa Nguyễn Văn Tùng ăm ‘nâi, tung pơla mơjiâng tơnêi ƀă rak vế tơnêi têa, Hải Phòng pơrá châ mâu kăn pơtáu mơnhên cho “bo cheăng dêi Pơlê xiâm”, cho tíu xiâm dêi tơdroăng xơpá, tơdrêng amê hlối cho kế ki tât krá rơdêi vâ rak vế tơnêi têa.

Pôa Vương Đình Huệ, Kăn xiâm hnê ngăn Kuô̆k hô̆i veăng a leh mơdĭng reăng Phươ̆ng khêi – Hải Phòng

Châ tơdroăng tơmâng ngăn dêi Đảng ƀă Tơnêi têa, mê Hải Phòng hiăng mơnhông rơdêi ƀă hơ’lêh khât. Kơlo ivá cheăng tơxup tơbriât râ kong pơlê dêi Pơlê kong kân Hải Phòng mâu hơnăm achê kố đi đo châ hơ’lêh, hơnăm kơ’nâi châ ối kơlo hên hên tâ hơnăm hdrối. Leh reăng phươ̆ng khêi – Hải Phòng 2022 cho tơdroăng ki kal vâ mơđah tơbleăng um méa, mơdêk hơ’lêh ƀă mơdêk ki dâi lĕm dêi mâu kế tơmeăm ôm hyô, veăng kum hơ’lêh tơdroăng cheăng kâ, mơnhông rêh ối pơlê pơla dêi pơlê kong kân.

Katarina Nga tơplôu ƀă tơbleăng