Hngêi kơmăi Kơphế Sơn La ai tâi tâng kơxô̆ liăn mơ’no pro 260 rơtal liăn, ƀă tâi tâng ivá 50.000 tâ̆n kloăng kơphế drêh/hơnăm, tơdâng 12.500 tâ̆n pơ’leăng kơphế/hơnăm. Ƀă ki tơ’lêi hlâu ‘na kong prâi, tơnêi tơníu, tơtro vâ pêt mơjiâng tơmeăm pêi lo ing chiâk deăng, tơkŭm, pêi kân, kong pơlê Sơn La hiăng tơkŭm pêt plâi kâ, kơtếo ƀă kơphế Arabia, châ 41,2% ƀăng deăng kơphế Arabica dêi lâp tơnêi têa; cho kong pơlê ai ƀăng deăng pêt kơphế Arabica kân má môi lâp tơnêi têa.

Pôa Lò Minh Hùng, Kăn phŏ hnê mơhno má môi cheăng Đảng kong pơlê Sơn La tối, tơdroăng djâ tơdroăng pêi cheăng Hngêi kơmăi kơphế Sơn La a tơring Mai Sơn, kong pơlê Sơn La, tơtro ƀă mơnhên troăng prôk mơnhông mơdêk cheăng kâ – rêh ối pơlê pơla ƀă kơvâ kơjo mơhnhôk mơ’no liăn cheăng dêi kong pơlê tung hneăng hơnăm 2020 – 2025; cho mơnhên nhên ăm tơdroăng djâ troăng pơkâ pêi dêi Đảng, troăng hơlâ dêi Tơnêi têa tung tơdroăng rêh ối; châ pói tơngah kô djâ pơxúa kân ăm khu mơ’no liăn cheăng, tơleăng mâu tơdroăng pơloăng mơnúa kân, ôh tá tơniăn tung ơdroăng pêt kơphế dêi kong pơlê.