VOV4.Xơ Đăng - Kơxê hâi lơ 12/7, pôa Vương Đình Huệ, Kăn xiâm hnê ngăn Kuô̆k hô̆i hiăng ai roh pêi cheăng ƀă Khu pơkuâ cheăng Đảng kong pơlê Phú Thọ. Pôa Vương Đình Huệ mơnhên tối, kheăn kơdeăn ƀă mơnhên hâk păng ‘nâng mâu tơdroăng châ tơƀrê ki Đảng ƀô̆, khu râ kăn pơkuâ ƀă kuăn pơlê mâu hdroâng kuăn ngo kong pơlê Phú Thọ hiăng châ tơƀrê tung pơla kố nah. Tơdroăng tơtêk cheăng kâ châ pơƀrê hên la ga xuân tá hâi tơxâng ƀă tơmeăm ki ai hlâu, ki tơ’lêi hlâu, mơnhông mơdêk tíu kơdrâm kuăn pơlê rêh ối tê mơdró ối hrá.

Tâi tâng a roh pêi cheăng

Kăn xiâm hnê ngăn Kuô̆k hô̆i pói vâ, kong pơlê Phú Thọ tơtrŏng mơnhông mơdêk cheăng kâ tiô xiâm rêi khôi túa lĕm tro vâi krâ nah dêi hdroâng kuăn mơngế. Phú Thọ hriăn plĕng mơnhông mơdêk tơdroăng xiâm kố tung mơnhông cheăng kâ, rêh ối pơlê pơla dêi kong pơlê tơná. Tơdroăng ki kố ai kơnâ troh lâp lup cho kân. Kong pơlê tơkŭm mơjiâng pêi pro Tơdroăng tơkêa bro mơnhông mơdêk pơlê kong kơdrâm Việt Trì chiâng pơlê kong kơdrâm leh mơdĭng vêh ƀă xiâm rêi hdroâng mơngế Việt Nam.

            A Sa Ly tơplôu ƀă tơbleăng