Ai vâ chê 60 tơdroăng pêi pro a péa tơnêi têa, tơdroăng cheăng rôh lăm pôu hên klêi chu a tơraih tơƀai, hneăng lăm pôu  péa kong têa Kŏng hoà Indonesia ƀă veăng hôp Kân Hội đồng AIPA 44; lăm pôu khât kong têa Islam Iran dêi pôa Vương Đình Huệ ƀă Khu kăn xiâm Kuô̆k hô̆i tơnêi têa hiăng châ tơpui hên tơdroăng tơniăn.

Kuô̆k hô̆i Việt Nam - Indonesia ƀă Việt Nam - Iran hiăng kĭ tơhrâ tơrŭm cheăng nếo tơtro ƀă tơdroăng rêh ối cheăng kâ dêi péa tơnêi têa xuân môi tuăn mơdêk tơrŭm cheăng pơla péa Kuô̆k hô̆i, môi tuăn mơdêk tơpui tơno tung tâi tâng khu kăn, tối ăm dêi rơpó ‘nâi mâu tơdroăng cheăng pêi mâu luât pơkâ xuân môi tiah tơrŭm tơdroăng cheăng séa ngăn, tơrŭm tung mâu tơdroăng cheăng lâp plâi tơnêi.

Pakĭng mê, hneăng lăm pôu mê, mâu khu xiâm tơdjâk troh xuân hiăng kĭ tơhrâ hên tơdroăng tơrŭm cheăng ki pơrá phá. Kố cho rôh ki hdró, tíu ki pơxiâm ki kal ăm tơdroăng tơrŭm cheăng pơla péa pâ. Veăng hôp Hô̆i đong AIPA -44, pôa Vương Đình Huệ, Kăn xiâm hnê ngăn Kuô̆k hô̆i xuân hiăng ai rôh trâm mâ pơla péa pâ tơpui tơdroăng mơdêk tơrŭm krá tâ nếo ƀă mâu kong têa ki tơrŭm tung khu.