VOV4.Xơ Đăng - Pôa Võ Văn Thưởng, Hnê mơhno má môi Khu pơkuâ hnê ngăn cheăng Đảng teăng mâ Khu xiâm kal kí nếo kĭ tơbleăng ăm pêi pro Pơkâ 65 dêi Khu xiâm kal kí ‘na tơdroăng pơ’lêh tíu pêi cheăng mâu kăn ƀô̆. Ing troăng tơmiât pêi tung pơ’lêh tíu pêi cheăng kăn ƀô̆ cho môi tơdroăng xiâm tung tơdroăng rah xo kăn ƀô̆, pơkâ 65 châ tơbleăng ăm pêi pro ƀă pơkâ xiâm pơtối pơ’lêh nếo tơdroăng pơ’lêh tíu pêi cheăng kăn ƀô̆, tơniăn krá, kuăn pơlê pơkuâ dêi hnoăng cheăng, ôh tá tơdjâk pakong, tơbleăng tơdrăng, tơdâng tơ’mô; ôh tá ăm ai tơdroăng ki ôh tá tro tung tơdroăng rah xo kăn ƀô̆ pêi cheăng.

Pơkâ xuân tối nhên, mâu ngế, tíu pêi cheăng pơ’lêh, pơtối mê tơdroăng pơ’lêh tíu cheăng ing râ kơpêng chu râ pá kơdâm, ing râ pá kơdâm to râ kơpêng, ing kong pơlê kố pêi cheăng a kong pơlê ki ê; pơla kơ koan, khu tơrŭm cheăng rơtế râ tung khu cheăng kal kí. Mơngế vâ pơ’lêh tíu pêi cheăng cho mâu kăn ƀô̆ châ rah xo hnê mơhno, pơkuâ mâu râ.

Tơdroăng ai pơkâ, râ ai hnoăng pơkâ pơ’lêh tíu pêi cheăng kăn ƀô̆ pôu râng hnoăng cheăng pơkuâ mơjiâng pơkâ pêi pơ’lêh tíu pêi cheăng kăn ƀô̆ ƀă xing xoăng tơdroăng cheăng ƀă kăn ƀô̆ klêi kơ’nâi pơ’lêh tíu cheăng; pêi pro tiô, mơ-éa thế tơniăn kuăn pơlê pơkuâ dêi hnoăng cheăng, tơdrăng lĕm; séa ngăn, pơxâu phak mâu tơdroăng pro xôi; pơkuâ, mơnhên, séa mơnhên rêm hơnăm ƀă kăn ƀô̆ pơ’lêh tíu pêi cheăng; mơgêi pơtân, mơgêi tơdroăng pơ’lêh tíu pêi cheăng kăn ƀô̆.

A Sa Ly tơplôu ƀă tơbleăng