Tơdế hơnăm nah, rơpŏng pôa Lê Huy Dũng, a pơlê kân Lộc Thắng, tơring Bảo Lâm, kong pơlê Lâm Đồng trâm tơdroăng pá xua ôh tá ai hngêi ối. 5 ngế ối tung rơpŏng 3 rơxông thế djâ dêi pó lăm tí tăng mung hngêi vâi ki ê ối pơtân, tơdroăng rêh ối pá puât ‘nâng. Xiâm kối cho hngêi dêi rơpŏng pôa hiăng tơ’nhê xua mê hiăng khoh têa tah lôi. Drêng pro mâu hlá mơ-éa vâ mơjiâng hngêi nếo mê khu râ kăn pơkuâ pơlê kân ôh tá ăm phêp xua tâi tâng ƀăng deăng tơnêi dêi rơpŏng pôa pơrá ối tung pơkâ chiâ xo tơmeăm khoăng tung kơdâm tơnêi. Pôa Lê Văn Huy Dũng, tối:

“Pâ thế Chin phuh ai hlá mơ-éa pro pơhôi, lơ ‘mâi rơnêu, lơ pơhlêh vâ kuăn pơlê ngin ai tíu ối vâ pêi cheăng kâ, rêh ối. Châ khât ai tơnêi mê ôh tá chiâng vâ pro hngêi, ôh tá ai hngêi mê ngin ôh tá ‘nâi pro ti lâi, gá cho pá puât păng ‘nâng’’.

Rơpŏng jâ Phạm Thị Năm, ối a bêng Lộc Tiến, pơlê kong kơdrâm Bảo Lộc, kong pơlê Lâm Đồng xuân trâm tơdroăng môi tiah mê. Hngêi ối, tơnêi mơjiâng tơmeăm dêi rơpŏng dế pêi kâ tơniăn, tro tiô luât, ối tung kơpong kuăn pơlê rêh ối kơdrâm mê kơdrâ ‘’mơdât’’, ôh tá chiâng vâ klâ ăm mâu kuăn ‘nĕng lơ kok vâ mung liăn a hngêi arak liăn. Jâ Phạm Thị Năm tối ăm ‘nâi:

“Bêng Lộc Tiến ngin kô ai mâu rơpŏng kơdrâm kuăn ‘nĕng, rêh ối tơdjuôm 3 – 4 rơxông laga ôh tá klâ tơnêi ăm mâu kuăn ối krê. Hên rơpŏng vâ mơnhông cheăng kâ, vâ mung liăn hngêi arak liăn xuân ôh tá châ mung xua kreăng pơkâ pêi. Ki rơhêng vâ tối, nôkố hên hngêi kuăn pơlê hiăng tơ’nhê ó laga vâ rơnêu xuân ôh tá kâi chiâng’’.

Tiô Pơkâ kơxô̆ 866 hâi lơ 18/7/2023 dêi Ngế pro xiâm hnê ngăn Chin phuh ‘na tơdroăng kĭ Pơkâ mơnhên ngăn, chiâ xo, bro ƀă xúa mâu tơmeăm khoăng tung kơdâm tơnêi têa hneăng hơnăm 2021 – 2030, tơmiât pêi troh hơnăm 2050, a kong pơlê Lâm Đồng ai lối 70.000 ha tro pơkâ pêi bô bối, tơdjâk troh rơpâu rơpŏng kuăn pơlê ƀă vâ chê 100 rơpâu pơ’leăng mâ mơngế. Tiô pôa Võ Ngọc Hiệp, Kăn phŏ hnê ngăn Vi ƀan kong pơlê Lâm Đồng, tơdroăng pơkâ chiâ xo tơmeăm khoăng tung kơdâm tơnêi bô bối a kơpong kuăn pơlê rêh ối ôh tá xê to pro tơvâ tơvân, pro pá troh tơdroăng mơjiâng pro ƀă tơdroăng rêh ối dêi kuăn pơlê mê ối ối pro tơdroăng pêi cheăng vâ mơnhông cheăng kâ – rêh ối pơlê pơla dêi kong pơlê tro tot pơtê.

“Vâ tơniăn tơdroăng mơnhông tơniăn mê kal séa ngăn tah lôi pá puât tung tơdroăng bô bối pêi pro pơkâ chiâ xo, séa ngăn tơmeăm tung kơdâm tơnêi. Tâi tâng lối 50% ƀăng deăng tơnêi a tíu xiâm tơring Bảo Lâm, môi iâ dêi Bảo Lộc xuân a kơpong tíu xiâm, klêi mê mâu tơdroăng tơkêa bro mơ’no liăn cheăng tơnêi têa, hên kơpong mơnhông... pơrá ối tung kơpong pơkâ séa ngăn, bro tơmeăm khoăng tung kơdâm tơnêi. Nôkố tâi tâng mâu tơdroăng pơrá tro tot pơtê, tá mâu kơpong kơdrâm rêh ối tê mơdró, kơpong kuăn pơlê rêh ối, drêng vêh xĕn ối’’.

Hlo nhên tơdroăng ki pá dêi Pơkâ chiâ xo tơmeăm khoăng tung kơdâm tơnêi, tung têa tiô pơkâ 866, tung roh lăm pêi cheăng a mơ’nui khế 8/2024 a kong pơlê Lâm Đồng, pôa Phạm Minh Chính, Ngế pro xiâm hnê ngăn Chin phuh hiăng hnê mơhno Khu xiâm pơkuâ kế tơmeăm khoăng loăng pơlái kong kế ƀă kong prâi thâ séa ngăn ƀă tah lôi pá puât. Pôa Phạm Minh Chính, Ngế pro xiâm hnê ngăn Chin phuh, tối nhên:

“Kố cho pá ‘na luât, xua mê Khu xiâm pơkuâ kế tơmeăm khoăng loăng pơlái kong kế ƀă kong prâi thế tơkŭm, djâ mot vâ ‘mâi rơnêu luât chiâ xo tơmeăm khoăng tung kơdâm tơnêi, ki má lối cho mâu tơdroăng ôh tá tơtro ƀă tơdroăng nôkố mê hdrối nah pin pêi. Nôkố tá hâi chiâng chiâ xo tơmeăm khoăng tung kơdâm tơnêi mê thế ăm vâi xúa tơnêi a tíu vâ chiâ xo tơmeăm khoăng tung kơdâm tơnêi ăm vâi pêi, vâ pêt tơmeăm khoăng, vâ rêh, ƀă drêng lâi chiâ xo tơmeăm khoăng tung kơdâm tơnêi mê pêi mơ’nui ah. A kố, tâng to pơkâ chiâ xo tơmeăm khoăng tung kơdâm tơnêi cho chiu hlâ, tiah mê kuăn pơlê rêh ối ƀă ki klâi? Mê cho mâu tơdroăng ki ôh tá tro ƀă tơdroăng nôkố’’.

Ƀă hnê mơhno dêi Ngế pro xiâm hnê ngăn Chin phuh, kuăn pơlê kong pơlê Lâm Đồng dế pói tơngah khât ƀă tơkôm mâu kơ koan ki tơdjâk rĕng tah lôi mâu tơdroăng ki ôh tá tro tung pơkâ chiâ xo tơmeăm khoăng tung kơdâm tơnêi vâ rak tơniăn tơdroăng rêh ối, mơnhông cheăng kâ – rêh ối pơlê pơla.