A rôh pêi cheăng, péa pâ hiăng tơpui tơno ‘na tơdroăng mơnhông mơdêk cheăng kâ, rêh ối pơlê pơla ƀă tơdroăng ôm hyô a rêm kong pơlê. Kăn pơkuâ Dak Lak tối tơbleăng: Dak Lak cho kong pơlê a tíu xiâm kơpong Tây Nguyên, ƀă 49 hdroâng kuăn ngo rơtế rêh ối, ai hên tơdroăng mơhno túa lĕm tro.

Pơlê kong kân nôkố ai ƀăng tơnêi pêt kơphế kân, kloăng kơphế châ xo dâng 400 rơpâu tâ̆n rêm hơnăm. Kơphế Ƀuôn Ma Thuột cho inâi ki châ vâi ô eăng, hiăng châ rak vế hnê mơhno tơnêi tơníu. Tung pơla hdrối nah kong pơlê hiăng ai hên tơdroăng cheăng tơrŭm cheăng ƀă Hàn Quốc, tung mê ai tơdroăng kĭ hlá mơ-éa chôu vế tơrŭm cheăng pơla péa pâ pơla kong pơlê Dak Lak ƀă kong pơlê Jeollabuk dế pro pơxúa tơƀrê tung mâu kơvâ cheăng.

Klêi kơ’nâi tơpui tơno ƀă tăng ‘nâi, 2 kong pơlê pơrá rơhêng vâ tơrŭm cheăng tung 3 kơvâ, mê cho: ôm hyô, mơhno túa lĕm tro ƀă tê mơdró. Pôa Oh Jun Hwan, Kăn pơkuâ Khu po kơchơ reăng pơlê kong kân Goyang, tối tiah kố, gá tro khât tâng châ tơrŭm cheăng tơkŭm po rôh mơdĭng reăng tơdjuôm ƀă po mơdĭng kơphế, mơđah mâu kế tơmeăm kơphế Dak Lak a kong têa Hàn Quốc.