Tơpui a rôh trâm mâ, pôa Hoàng Minh Nhân, Kăn hnê ngăn Khu tơrŭm tơroâ Việt Nam – Rusi hơ’muăn tối tơdroăng ki ôh tá tơniăn tung rôh ton nah “10 hâi pro lâp plâi tơnêi ôh tá tơniăn” dêi rôh Kăch măng Khế 10 Rusi. A Việt Nam, Kăch măng Khế 10 Rusi ai pơxúa khât, măn chôu tơdroăng tơdjâk kân ƀă tơdroăng pêi pro troh kăch măng ƀă tơdroăng ki mơnhông tiô dêi tơnêi têa.

Tơdrêng a mê hlối pơkâ ivá ăm tơrŭm cheăng khôi hmâ tơniăn lĕm pơla péa hdroâng mơngế Việt Nam - Rusi. Pôa Valery Mikhailovich Karchagin, Kăn pơkuâ – Ngế ki tăng ‘nâi tơdroăng kal ăm kăn pơkuâ kong têa Rusi a Pơlê kong kân Hồ Chí Minh ăm ‘nâi: hâi leh kố cho mơhno ăm mâu tơdroăng ki kơnía git dêi hdroâng mơngế Rusi – hiâm mơno pa nhuô̆m tơnêi têa, tơdroăng ki veăng rơtế vâ rak vế ki tơniăn krê dêi tơná.

Tiô pôa Valery Mikhailovich Karchagin, kong têa Rusi mơnhên tối khât ivá mơ-eăm dêi mâu kong têa ki nhŏng o tơrŭm, malối cho kuăn pơlê Việt Nam.