Pơlê kong kơdrâm Vinh cho tíu xiâm cheăng kâ – kal kí dêi Nghệ An – pơlê xiâm dêi pôa Hồ Chí Minh, Kăn xiâm hnê ngăn tơnêi hneăng apoăng to tơdroăng nhuô̆m pâ ƀă mâu ngế pêi cheăng kăch hneăng hdrối nah. Tung 60 hơnăm hiăng hluâ, ki rơhêng vâ tối tung 10 hơnăm pêi pro Pơkâ kơxô̆ 26 dêi Khu xiâm kal kí ‘na troăng pêi la ngiâ, hnoăng cheăng mơnhông kong pơlê Nghệ An troh hơnăm 2020, pơlê kong kơdrâm Vinh ai troăng mơnhông tâi tâng, ƀă hên tơdroăng châ tơƀrê, tơdroăng châ tơƀrê ki kal.

Hơnăm 2022, kơlo tơtêk cheăng kâ châ 9,02%; pêi lo liăn rêm pơ’leăng mơngế châ 120 rơtuh liăn, châ 2,37 xôh tơdâng tơdjuôm dêi kong pơlê. Rơkâu mâu tơdroăng châ tơƀrê pơlê kong kơdrâm châ, pôa Vương Đình Huệ, Kăn xiâm hnê ngăn Kuô̆k hô̆i pơkâ thế, kong pơlê kal thâ pêi pro pơkâ pêi, tơdroăng pơkâ pêi kong pơlê Nghệ An rơxông 2021 – 2030 nếo châ kĭ; mơnhên troăng tơmiât pêi la ngiâ ƀă troăng pêi cheăng ton xŏn vâ mơnhông pơlê kong kơdrâm Vinh tung tơrŭm tâi tâng dêi kong pơlê Nghệ An ƀă lâp kơpong, pêi pro pơkâ mơnhông mơdêk troăng kân Vinh - Cửa Lò, mơjiâng tơdroăng mơnhông cheăng kâ, tơdjêp mâu tơdroăng ki kal, tơdjêp tíu xiâm pơkuâ pơlê kong kơdrâm ƀă Tíu xiâm ôm hyô têa kơxĭ.