VOV4.Xơ Đăng - A Hngêi Kuô̆k hô̆i, pôa Vương Đình Huệ, Kăn xiâm hnê ngăn Kuô̆k hô̆i pơkuâ roh pêi cheăng ƀă Khu hnê mơhno má môi Vi ƀan cheăng kâ dêi Kuô̆k hô̆i tơpui ‘na tơbleăng séa ngăn 5 hơnăm pêi pro Pơkâ kơxô̆ 31/2016 dêi Kuô̆k hô̆i ‘na pơtê pêi pro troăng hơlâ mơ’no liăn cheăng pro on tơhrik kơtâu ƀă trếo tik nik Ninh Thuận.

A roh pêi cheăng, klêi kơ’nâi tơmâng rơkong tơpui tơno, pôa Vương Đình Huệ mơnhên tơdroăng pơtê lôi tơdroăng tơkêa bro on tơhrik Ninh Thuận cho môi troăng hơlâ, pơkâ pêi tơtro dêi Tơnêi têa ƀă pơkâ, Vi ƀan Cheăng kâ Kuô̆k hô̆i tơmâng xo rơkong a roh hôp, tơrŭm ƀă mâu Khu xiâm, kơvâ cheăng ƀă kong pơlê Ninh Thuận pêi kêi đeăng tơbleăng séa ngăn tơdroăng châ tơƀrê 5 hơnăm pêi pro Pơkâ kơxô̆ 31 dêi Kuô̆k hô̆i, séa ngăn, mơnhên mâu tơdroăng châ tơƀrê ƀă ối tơvâ tơvân.

Ki má lối cho tơdroăng xĕn kuăn pơlê, vêh xĕn ăm kuăn pơlê rêh ối tiú ê tơniăn, pơkâ pêi, xing xoăng tơnêi ăm pêt mơjiâng tơmeăm klêi  kơ’nâi pơtê pêi pro tơdroăng tơkêa bro on tơhrik kơtâu ƀă trếo tik nik, pâ thế ƀă Kuô̆k hô̆i, Chin phuh pơtối tah lôi tơdroăng pá puât, pro tơ’lêi hlâu ăm kong pơlê Ninh Thuận pơtối mơnhông mơdêk rĕng, krá tơniăn tâ.

A Sa Ly tơplôu ƀă tơbleăng