VOV4.Xơ Đăng - Kơxê lơ 12/4, Khu pơkuâ cheăng Đảng pêi cheăng tung Kuô̆k hô̆i pêi cheăng ƀă Khu hnê mơhno Tơnêi têa mơgêi Pơkâ kơxô̆ 19 hneăng má XI ‘na pơtối pơhlêh nếo troăng hơlâ, luât ‘na tơnêi tơníu tung rơxông thăm mơnhông tâi tâng roh pơhlêh nếo, mơjiâng xiâm kối troh hơnăm 2020 tơnêi têa pin chiâng tơnêi têa pêi cheăng xúa kơmăi kơmok tiô troăng rơxông nếo.

Pôa Vương Đình Huệ, Kăn xiâm hnê ngăn Kuô̆k hô̆i xông tơpui a hneăng hôp

Xông tơpui a hneăng hôp, pôa Vương Đình Huệ, Kăn xiâm hnê ngăn Kuô̆k hô̆i tối nhên, pơkâ xiâm dêi tơdroăng mơgêi pơkâ 19 ƀă ‘mâi rơnêu Luât tơnêi tơníu cho vâ pơkuâ, xúa tơnêi tơníu châ tơƀrê tâ, pro xiâm kối mơnhông tơdroăng mơnhông mơdêk krá tơniăn dêi tơnêi têa, tơdrêng amê kơdroh tơdroăng xăm tối xăm tơkêng tơdjâk troh tơnêi tơníu.

Hneăng hôp hiăng tơkŭm tơpui tơno, mơnhên mâu tơdroăng ki nếo dêi tơbleăng mơgêi ƀă tơdroăng tơkêa bro Pơkâ nếo tâng pơchông ƀă Pơkâ kơxô̆ 19 ing tơdroăng kal kí cho hnoăng cheăng xiâm dêi khu cheăng kal kí mơjiâng tơnêi têa tung rơxông hluâ to chưh nghiah pơlê pơla (tơ’nôm, mơnhông mơdêk hơnăm 2011), Luât hơnăm 2013, tiô khoa hok, xiâm kối tơdroăng nôkố dêi mâu pơkâ thế, tơdrêng amê mơnhên nhên tơdjâk dêi mâu pơkâ ƀă tơdroăng pơkuâ, xúa châ tơƀrê tơnêi tơníu.

A Sa Ly tơplôu ƀă tơbleăng