VOV4.Xơ Đăng - Kơxo lơ 3/6, a pơlê kong kơdrâm Đà Lạt, Khu xiâm pơkuâ ‘na pêi chiâk deăng ƀă mơnhông thôn pơlê hiăng pêi pro Tơdroăng tơkêa bro Pơkuâ kong kế lĕm mơnâ mâ ngăn krá tơniăn tŭm têk ing troăng châ achê pơlê kong kơdrâm mơnhông mơdêk krá tơniăn ôh tá pro hía kong a Lâm Đồng ƀă Dak Nông.

Pơxiâm pêi pro tơdroăng kong kế lĕm mơnâ mâ ngăn krá tơniăn a Lâm Đồng ƀă Dak Nông 

Tơdroăng tơkêa bro xua Khu tơrŭm châu Âu - EU tŏng kum ing Tơdroăng mơnhông Khu lâp kong têa dó inâi UNDP, kơnâ 5 rơtuh euro ƀă pêi pro tung hneăng hơnăm 2022 – 2026.

Pơkâ pêi troh cho thăm pro ăm rơdêi tâ, krá tơniăn tâ ‘na kong prâi, tơdroăng tŏng kum rêh ối pơlê pơla, ivá kâi ƀă kâi trâng tung tơdroăng pêt mơjiâng tơmeăm khoăng chiâk deăng ƀă mâu tơdroăng pêi cheăng dêi kơpong Tây Nguyên. Tơdrêng amê, rak tơniăn tăng cheăng pêi ăm khu ki tơ’lêi tơdjâk, mơngế hdroâng kuăn ngo ƀă vâi kơdrâi tung mâu tơdroăng pêi pro kơnâ tơmeăm pêi lo ing chiâk deăng, loăng pơlái kong kế ƀă ôm hyô ngăn loăng pơlái kong kế.

Pŭn tơring châ rah mơnúa ‘na tơdroăng châ achê kong kế lĕm mơnâ mâ ngăn, ôh tá ăm hía kong mê cho Dak Glong, Dak R’Lấp dêi kong pơlê Dak Nông ƀă Di Linh, Lạc Dương dêi kong pơlê Lâm Đồng.

A Sa Ly tơplôu ƀă tơbleăng