Po tung pơla 2 hâi (23-24/9), Hâi mơdĭng pơxiâm pêi cheăng pơhlêh nếo tơmiât rơkê kong pơlê Dak Lak hơnăm 2024 (Techfest Dak Lak 2024) ai hên tơdroăng môi tiah: mơđah tơbleăng mâu tơdroăng tơkêa, kế tơmeăm pơxiâm pêi cheăng, OCOP, kơmăi kơmok thôn pơlê, tê mơdró; ai mâu rôh po tơdroăng ‘na pơxiâm vâ pêi cheăng pơhlêh nếo tơmiât rơkê, pơxiâm pêi cheăng ngiât, troăng hơlâ mơdêk vâ pêi cheăng tung mâu kơvâ cheăng, mâu khu ngế.

Kố cho tơdroăng ki châ tơkŭm po rêm hơnăm, vâ pro tơ’lêi hlâu trâm mâ tơpui tơno tung mâu khu pơxiâm vâ pêi cheăng, tơdjêp ‘no liăn cheăng, tí tăng khu tơrŭm, po rơdâ kơchơ tê mơdró. Pôa Nguyễn Tuấn Hà, Kăn phŏ hnê ngăn Vi ƀan kong pơlê Dak Lak ăm ‘nâi, mâu tơdroăng cheăng pơxiâm vâ pêi cheăng a kong pơlê hiăng pêi pro hlo tơƀrê, veăng gum mơjiâng tơdroăng ki vâ pơxiâm pêi cheăng Dak Lak mơnhông tiô troăng trâu hơngế, tơdjâk hiâm mơno pơxiâm vâ pêi cheăng hâk vâ tung mâu rơxông kuăn pơlê.