Tiô tối hdrối tâi tâng hâi pêi cheăng dêi Rôh hôp mê ai 29 hâi tơdế. A rôh hôp mê, Kuô̆k hô̆i kô séa ngăn, tơbleăng 15 luât, ki tơxâng vâ tối cho Luât tơpâ mơdât on chếo ƀă tŏng xo mâu ngế xía vâ. Luât ‘mâi hơ’lêh, tơ’nôm a mâu tơdroăng Luât ƀaoh hiêm khăm pơlât; Luât hbrâ mơdât, tê rôe mơngế (‘mâi hơ’lêh); Luât kŏng đoân (‘mâi hơ’lêh)... Kuô̆k hô̆i xuân séa ngăn, ăm hnê tối 13 tơdroăng tơkêa Luât, tơxâng vâ tối  cho tơdroăng tơkêa Luât On tơhrik (‘mâi hơ’lêh); tơdroăng tơkêa bro Luât thái cô Hnê hriâm; tơdroăng tơkêa Luât Pro hnoăng mơhá pê lo dêi mâu khu mơdró (‘mâi hơ’lêh); Tơdroăng tơkêa Luât ‘mâi hơ’lêh, tơ’nôm mâu tơdroăng Luât Tơbleăng.

A rôh hôp má 8 Kuô̆k hô̆i xuân tối tơdroăng pêi pro tiô pơkâ mơnhông cheăng kâ - rêh ối  pơlê pơla, liăn ngân tơnêi têa hơnăm 2024 ƀă séa ngăn, pơkâ mơnhông cheăng kâ rêh ối pơlê pơla, tối hdrối liăn ngân tơnêi têa, troăng hơla xing xoăng liăn ngân xiâm tơnêi têa hơnăm 2025; séa ngăn mâu hlá mơ-éa chêh tơbleăng ‘na tơdroăng luât, tơdroăng mơdât kâ kơluâ, plâ mơdât mâu ki pro xôi ƀă mâu ki xôi luât, tơleăng mơnhên klêi tơdroăng pâ thế dêi kuăn pơlê.