VOV4.Xơ Đăng - Kơxo lơ 26/5, Hneăng hôp tơpui tơdroăng tung la ngiâ châu Á roh má 27 hiăng po a pơlê kong xiâm Tokyo, kong têa Nhuk veăng hôp mê ai hên mâu kăn xiâm châu Á mê cho  pôa Lý Hiển Long, Ngế pro xiâm hnê ngăn kong têa Singapore, pôa Prayut Chan-o-cha, Ngế pro xiâm hnê ngăn kong têa Siam. Pôa Phạm Bình Minh, Ngế pro xiâm hnê ngăn  tơnêi têa pin pơkuâ djâ khu kăn xiâm Việt Nam veăng hôp a hneăng hôp. Hneăng hôp roh kố ai pơxá “Tơpui ‘na hnoăng cheăng dêi châu Á tung lâp plâi tơnêi ki tơklâ”.

Pakĭng mâu ƀai tơbleăng tơdrêng dêi mâu kăn a hneăng hôp mơ’no tiô troăng hyôh Internet, hên rôh tơpui tơno tung 2 hâi ƀă pơxá mê cho: Pơ’lêh lâp plâi tơnêi ing châu Á - tung la ngiâ châ mơjiâng ing mâu khu mơdró; tơdroăng tơxul tơxal pơla Mih - Sinuâ ƀă tơdjâk troh tơdroăng ôh tá tơniăn, ‘na kring vế tơniăn, ‘na cheăng kâ dêi châu Á; mơnhông mơdêk khu mơdró châu Á ing tơdroăng trâm mâ, mơhno túa lĕm tro... kô châ po.

Ing mê, mâu kong têa châu Á kô tơrŭm krá tâ tung tơdroăng hbrâ ví pơloăng mơnúa ki nếo tung kơpong ƀă tung lâp plâi tơnêi, mơjiâng môi kơpong  mơnhông mơdêk ‘no hnoăng veăng pro hơniâp lĕm ƀă tơniăn dêi kơpong.