Xông tơpui a hneăng hôp tơpui tơno, Ngế pro xiâm hnê ngăn kong têa Kul Hun Manet mơnhên kô pơtối pơ’lêh tíu mơ’no liăn tê mơdró ƀă mâu troăng pêi ki xiâm, ƀeăn ƀĕng vâ tơniăn mâu khu mơ’no liăn cheăng hmiân tuăn mơ’no liăn cheăng a kong têa Kul.

Chin phuh Kul xuân kô mơ-eăm vâ pro tơ’lêi hlâu tâ nếo ăm mâu khu mơ’no liăn cheăng kong têa ê; krếo thế mâu khu mơ’no liăn cheăng péa tơnêi têa thăm tơrŭm tung kơvâ cheăng kâ ƀă mơ’no liăn cheăng ing tơkŭm po tơpui tơno, hôp tơpui khu tê mơdró mơ’no liăn ai krếo khu râ kăn pơkuâ péa tơnêi têa; krếo thế mâu khu mơ’no liăn cheăng Việt Nam troh mơ’no liăn cheăng a kong têa Kul hên tâ mê nếo; mơhnhôk mâu khu mơ’no liăn cheăng kong têa Kul mơ’no liăn cheăng a Việt Nam vâ ai hên tơmeăm tung mơjiâng, tê mơdró, tíu ki mơjiâng pro tơxâng kal dêi tơná.

‘Na peăng dêi tơná, Ngế pro xiâm hnê ngăn tơnêi têa Phạm Minh Chính kheăn kơdeăn tơdroăng tơkŭm po tơpui tơno; mơnhên mâu kăn teăng mâ veăng pơrá veăng kum tơbêng tuăn pâ nhŏng o ƀă tơrŭm cheăng pơla péa tơnêi. Ƀă Việt Nam xuân môi tiah kong têa Kul, péa tơnêi têa kô pro tơ’lêi hlâu má môi ăm mâu khu mơ’no liăn cheăng.

Ngế pro xiâm hnê ngăn tơnêi têa krếo thế mâu khu mơ’no liăn cheăng tơkŭm tung pơ’lêh xúa kŏng ngê̆, cheăng kâ đi đo tiah mê, mơ’no cheăng tiô a khoa hok kŏng ngê̆, pơ’lêh nếo tơmiât pêi rơkê, ing mê mơdêk râ 2 tơdroăng cheăng kâ, tối ăm dêi pó túa ki rơkê tơtro tơrŭm cheăng, po rơdâ tâ nếo tíu ăm mơnhông mơdêk.