Kơxo lơ 26/12, a Hà Nội, Hneăng hôp lâp tơnêi têa Khu pơkuâ kuăn pơlê pêi chiâk deăng Việt Nam roh má VIII, hneăng hơnăm 2023 – 2028 pơxiâm po kân krip a Tíu xiâm Hneăng hôp Tơnêi têa Mỹ Đình. Kăn xiâm pơkuâ hnê ngăn Đảng Nguyễn Phú Trọng troh veăng ƀă ai ƀai xông tơpui hnê mơhno ki kal a Hneăng hôp.

Dó inâi ‘’Rŭm môi tuăn – Kuăn pơlê pơkuâ dêi hnoăng cheăng – Tơmiât pêi rơkê – Tơrŭm – Mơnhông mơdêk’’ Hneăng hôp Khu pơkuâ kuăn pơlê pêi chiâk deăng Việt Nam roh má VIII veăng amê ai vâ chê 1 rơpâu kăn teăng mâ ki châ krếo, teăng mâ ăm lối 10 rơtuh ngế tơrŭm, kuăn pơlê pêi chiâk deăng lâp tơnêi têa.

A hneăng hôp, mâu kăn teăng mâ tơkŭm tơpui tơno, tối tung tơdroăng tơkêa bro mâu mơ-éa ki kal, mê cho: Tơbleăng kal kí dêi Khu xiâm pơkuâ Khu kuăn pơlê pêi chiâk deăng Việt Nam hneăng má VII; Mơ-éa chêh hdrối Tơbleăng tối tơdroăng tá hâi tro dêi Khu xiâm pơkuâ Khu pơkuâ kuăn pơlê pêi chiâk deăng Việt Nam hneăng má VII; Hlá mơ-éa chêh hdrối Luât Khu pơkuâ kuăn pơlê pêi chiâk deăng Việt Nam (tơ’nôm, ‘mâi rơnêu).

Hneăng hôp xuân tơpui tơno pơkâ troăng pêi la ngiâ, pơkâ xiâm, hnoăng cheăng ăm plâ hneăng; rah xo Khu pơkuâ cheăng hneăng hơnăm 2023 – 2028. Tung tơdroăng Hneăng hôp xuân kô tơkŭm po 10 hneăng hôp tơpui tơno tơdroăng vâ pơkâ troăng tơmiât pêi tơleăng mâu tơdroăng kân ƀă tơdroăng pêi cheăng dêi Khu pơkuâ kuăn pơlê pêi chiâk deăng Việt Nam, tơmâng xo mâu rơkong tơpui, pơkâ thế vâ tơkŭm tâi tâng, tơmâng xo tung mơ-éa ki kal Hneăng hôp.

Xông tơpui hnê mơhno hneăng hôp, Kăn xiâm pơkuâ hnê ngăn Đảng Nguyễn Phú Trọng pơkâ thế, mâu khu râ Khu pơkuâ kuăn pơlê pêi chiâk deăng lâp tơnêi têa kal pơtối pơ’lêh nếo rơdêi tâ nếo hnoăng cheăng xiâm, troăng pêi cheăng, mơdêk tơdroăng ki dâi lĕm, châ tơƀrê tơdroăng pêi cheăng dêi khu; mơjiâng Khu pơkuâ kuăn pơlê pêi chiâk deăng Việt Nam rế hía rế krá rơdêi, cho khu teăng mâ ăm hnoăng, pơxúa tơtro luât, tơxâng dêi kuăn pơlê pêi chiâk deăng; mơnhông lĕm tro hnoăng cho tíu xiâm, ki xiâm ăm tơdroăng pêi cheăng kuăn pơlê pêi chiâk deăng, cho kông tơdjêp pơla kuăn pơlê pêi chiâk deăng ƀă Đảng, Tơnêi têa; cho xiâm kối ki tơtro tung khu rŭm môi tuăn tâi tâng hdroâng mơngế, tơrŭm ‘’kŏng nhân – kuăn pơlê pêi chiâk deăng – mơngế ki rơkâ’’.