Kơxo hâi lơ 24/8, a Hngêi hôp kân Pơlê kong kân Hải Phòng (kơxô̆ 18 Hoàng Diệu, pơlê krâm Hồng Bàng, pơlê kong kân Hải Phòng), khu kăn xiâm Đảng, Kuô̆k hô̆i, Kăn xiâm hnê ngăn tơnêi têa, Chin phuh, Vi ƀan xiâm Măt trâ̆n tơnêi têa Việt Nam ƀă rơpŏng hngêi hiăng tơkŭm po leh lăm pôu ngăn pôa Lê Văn Thành, Ngế cheăng tung tíu xiâm Đảng, Ngế xiâm phŏ hnê ngăn Chin phuh tiô túa pro leh ‘mé kiâ râ kăn xiâm Tơnêi têa.

Poăng pôa Lê Văn Thành, Ngế xiâm phŏ hnê ngăn tơnêi têa hneăng hdrối kô tâp hlá cờ a poăng ki ‘măn a tíu ki krip a Hngêi hôp kân pơlê kong kân Hải Phòng.  

Pơxiâm leh pôu ngăn, Khu kăn xiâm Đảng mot ngăn veăng sĭng khéa, hơlêm rơpŏng hngêi pôa Lê Văn Thành. Pơtối mê, Khu kăn xiâm hnê ngăn tơnêi têa, Khu kăn tung Chin phuh, Khu kăn Kuô̆k hô̆i, Khu kăn Vi ƀan xiâm Măt trâ̆n tơnêi têa Việt Nam mot pôu ngăn pôa Lê Văn Thành. Troh pôu ngăn Ngế pro xiâm phŏ hnê ngăn tơnêi têa hneăng hdrối  ối ai mâu Kăn xiâm Đảng, tơnêi têa hneăng hdrối, mâu kăn rêm khu xiâm, kơvâ cheăng, khu xiâm tơnêi têa ƀă mâu kong pơlê; mâu kăn tơpui kâ, mâu vâi pú kong têa ê tung lâp plâi tơnêi.

Leh tơbâ hnoăng pôa Lê Văn Thành kô po a 7chôu  hâi lơ 26/8; leh djâ lăm ‘mé ƀă leh hdrối vâ ’mé Ngế pro xiâm phŏ hnê ngăn tơnêi têa xuân po a hâi ki mê a ilâng kiâ pơlê xiâm a Tân Liên, tơring Vĩnh Bảo, pơlê kong kân Hải Phòng.