Tơbleăng a rôh pơxiâm po leh, pôa Trần Hồng Hà, Phŏ Ngế pro xiâm hnê ngăn tơnêi têa tối: Leh tơbleăng kơphế Buôn Ma Thuột rôh kố cho tơdroăng pêi pro ai pơxúa, po klăng rôh tơbâ 50 hơnăm plâ ƀlêi trâng Buôn Ma Thuột. Leh mơdĭng ôh tá xê to tơdroăng ki vâ pơ-eăng kloăng kơphế Việt Nam, mê ối cho hneăng po vâ mơdêk troh lâp plâi tơnêi, tíu ki mâu kong têa pêt kơphế ƀă tê rôe kơphế tơkŭm, rơtế tối mâ ngăn hlo ‘na môi tơdroăng tung la ngiâ krá tơniăn dêi kơpvâ kơphế.

Hơnăm 2024, rôh apoăng Việt Nam tê kơphế ăm kong têa ê luâ 5 rơtal dollars, pơtối mơhno ki rơdêi cho tơnêi têa ki pêt kơphế, tê hên kơphế má péa tung lâp plâi tơnêi, kơ’nâi Brazil. Tung mê, Dak Lak  cho “pơlê xiâm pêt kơphế dêi Việt Nam” veăng ‘no hnoăng dâng 18% kơxô̆ kơphế tê ăm kong têa ê.

Phŏ Ngế pro xiâm hnê ngăn tơnêi têa pơkâ thế: Tung la ngiâ, mâu khu râ, khu xiâm, kơvâ cheăng, mâu cheăm tơring, Khu ngăn ‘na kơphế -Ca cao Việt Nam, mâu khu mơdró tối tơdjuôm mâ ngăn troăng hơlâ tơrŭm  pêi pro kơtăng vâ mơjiâng kơpong pêt kơphế ki dâi lĕm; mơjiâng ki pơxúa krá tơniăn.