Po tung pơla 5 hâi, Vi ƀan pơkuâ Kuô̆k hô̆i ăm rơkong veăng tơpui tối tung hên tơdroăng ki ki kal, tung mê ai rơkong tơpui tối ‘na hnoăng cheăng hbrâ rơnáu xo phĭu pôk ƀă ngế ki pêi dêi hnoăng cheăng xua Kuô̆k hô̆i pôk lơ kĭ a hneăng hôp má 6, Kuô̆k hô̆i hneăng 15. Tơpui pơxiâm po rôh hôp, pôa Vương Đình Huệ, Kăn xiâm hnê ngăn Kuô̆k hô̆i ăm ‘nâi tơdroăng cheăng hên, tơdroăng cheăng xơpá,tơdroăng ki xơpá gá xơpá khât, hâi khế kal rĕng pêi klêi.

Kăn xiâm hnê ngăn Kuô̆k hô̆i pơkâ thế mâu ngế cheăng tung Vi ƀan pơkuâ Kuô̆k hô̆i mơdêk hiâm mơno dêi mâu rôh hôp ki hdrối nah vâ ăm rơkong veăng tơpui tối tung mâu tơdroăng ki kal châ rak tơniăn rơkê dêi rôh hôp cho kal má môi.

Tung séa ngăn tâi tâng tung hnoăng cheăng hbrâ rơnáu ƀă mâu tơdroăng pơtroh ăm Kuô̆k hô̆i, klêi kơ’nâi hmâng mâu rơkong tơpui tối dêi mâu kăn Kuô̆k hô̆i, mâu Khu kăn Kuô̆k hô̆i,Vi ƀan pơkuâ Kuô̆k hô̆i kô ăm rơkong veăng tơpui tối rôh má mơ’nui ‘na tơdroăng ki kal dêi Hneăng hôp má 6 pơtroh ăm Kuô̆k hô̆i séa ngăn, têk kŏng tơbleăng a rôh hôp hbrâ.