Kơxo lơ 28/11, a kong pơlê Quảng Ninh, Viƀan xiâm Mât trâ̆n Tơnêi têa Việt Nam tơrŭm Kơ koan xiâm tơpui tơdroăng kal kí Sinuâ  tơkŭm po trâm mâ tơpui tơno nhŏng o pơla Viƀan xiâm Mât trâ̆n Tơnêi têa Việt Nam ƀă Kơ koan xiâm tơpui tơdroăng kal kí Sinuâ ƀă Viƀan Mât trâ̆n Tơnêi têa 7 kong pơlê dêi Việt Nam ƀă  Kơ koan xiâm tơpui tơdroăng kal Sinuâ 2 kong pơlê/kơpong ki pơkuâ xêh dêi Sinuâ ai tơdjuôm troăng tơkăng kong, roh má péa hơnăm 2023. Tơdroăng trâm mâ tơpui tơno má péa hơnăm 2023 cho kơnâ khât tung roh leh tơbâ 15 hơnăm mơjiâng tơrŭm cheăng ton xŏn tâi tâng pơla péa tơnêi têa, pơtối tơdroăng châ tơƀrê dêi tơdroăng roh má môi tơkŭm po a kong pơlê Vân Nam – Sinuâ hơnăm 2019.

A pơlê kong kơdrâm Hạ Long, mâu kăn teăng mâ péa tơnêi têa rơtế Hâi leh Rŭm môi tuăn tâi tâng hdroâng mơngế dêi pơlê kong kơdrâm, veăng lăm ngăn mâu tơmeăm mơđah tơbleăng tơmeăm OCOP ki phá tơ-ê dêi kong pơlê Quảng Ninh;. A kơdrum reăng Hạ Long, khu râ kăn teăng mâ rơtế pêt 75 xiâm loăng lát hoa, tơmiêt troh leh tơbâ 75 hơnăm hâi mơjiâng tơrŭm tơpui kâ Việt Nam – Sinuâ (18/1/1950 – 18/1/2025).