VOV4.Xơ Đăng - Pri hlá tơbeăng Tơnêi têa 2021, Hô̆i đong châm điêm hiăng rah xo châ 152 ƀai chêh ki vâ châm má mơ’nui ƀă kô diâp 10 pri A, 22 pri B, 48 pri C, 35 pri mơhnhôk ăm mâu ngế ki chêh mâu ƀai ki rơkê, tơtro, ro má môi. Tiô tơdroăng tối tơbleăng dêi khu teăng mâ Hô̆i đong châm tơ’noăng Pro hlá tơbeăng Tơnêi têa hơnăm 2021, roh châm tơ’noăng hlá tơbeăng roh kố ai hên mâu ƀai chêh ki ai tơdroăng tơviah nếo, tơpui leăng trâu hơngế, mơhno tối hiâm mơno ki hâk git, rơkê plĕng, tí tăng ‘nâi, tơ’mot hên ngế rơhêng vâ ‘nâi, mơhno tối tơdroăng ki rơkê păng ‘nâng. Ai hên ƀai ki ro rih xua ai tơdroăng ki chêh ton khế hơnăm, malối ƀă mâu ƀai chêh ai tơdjâk troh tơplâ, mơdât pơreăng COVID-19. Hiăng ai hên mâu ƀai chêh ki tơdrăng khât, ƀă pro phoih ƀriê tung hiâm mơno kuăn mơngế, mơhno tối tơdroăng ki khên tơnôu, mơ-eăm khât dêi ngế chêh hlá tơbeăng, ing mê, kô châ pro bâ eăng kân rơdâ, lâp lu tung pơlê pơla.

Tiô tơdroăng ki mơnhên tối tơchoâm, mâu ƀai ki veăng tơ’noăng roh kố hiăng tro tiô tơdroăng ki pơkâ, rah xo dêi Hô̆i đong châm điêm, mơhno tối tâi tâng, trâu hơngế tơdroăng rêh ối, cheăng kal kí, pêi cheăng kâ, rêh ối pơlê pơla, cheăng lêng, kring vế gak ngăn, tơrŭm tơpui kâ dêi tơnêi têa tung hơnăm 2021. Mâu ƀai chêh ki mê kơnôm ai tơdroăng mơ’no hiâm tuăn, hnoăng cheăng chêh tối hên ‘na tơdroăng pơreăng COVID-19 tâ tú tung pơlê pơla, tơkéa vâ tối, chêh ‘na kơvâ pơkeăng ƀă khăm pơlât kố ga ai hên má môi tung mâu tơdroăng ki ê.

Hên mâu ƀai chêh châ kâ pri ki kân, mơhno tối tơdroăng ki pôu râng hnoăng cheăng, tơdroăng kâi chân dêi khu chêh hlá tơbeăng ƀă tơdroăng ki vâ tí tăng pro pơxúa ăm tơdroăng ki păng ‘nâng ƀă tơdroăng ki tơtro khât, pro phoih tung hiâm mơno, plâi nuih dêi hên ngế.

Pri hneăng roh kố, Rơ’jiú xiâm Việt Nam hiăng ai hên mâu ƀai ki rơkê má môi. Tung mê, ai 2 pri A, 2 pri B ƀă 1 pri C. 2 pri A cho tơdroăng “Mâu hâi ki ôh  tá la lâi kâi piu” dêi khu chêh hlá tơbeăng Nguyễn Vũ Duy, Bùi Thị Thu Trang, Nguyễn Thị Minh Hạnh (Ban Thời sự - VOV1) ƀă 4 khu ƀai “Hang lông kĭng troăng ki păng ‘nâng păn roăng kơbố?”, dêi khu chêh hlá tơbeăng Trang Công Tiến, Phạm Trung Tuyến, Nguyễn Hữu Thịnh, Chu Trung Đức, Nguyễn Hải Bằng (Kênh VOV Giao thông). 2 ƀai ki châ kâ pri B mê cho “Hneăng tơplâ dêi tơdroăng ki tá chói ai” dêi khu chêh hlá tơbeăng Đinh Thị Thu Trang, Kiều Thanh Phương, Nguyễn Thị Ánh Tuyết, Lê Phương Thảo, Phạm Thị Thu Trang (Ban Văn hoá xã hội - VOV2) ƀă “Xah ƀai kâ liăn hmuâ pá kơdâm ‘mơ’mó mơ’no liăn khăm pơlât” dêi khu chêh hlá tơbeăng Nguyễn Sỹ Đoan, Nguyễn Phú Huân, Nguyễn Văn Tùng, Nguyễn Duy Bùi (Um tơvi KTS VTC).

Tung mê, ƀai chêh ki châ kâ pri A “Mâu hâi ki ôh tá la lâi kâi piu” dêi Khu chêh hlá tơbeăng Nguyễn Vũ Duy, Bùi Thị Thu Trang, Nguyễn Thị Minh Hạnh - Mê Khu ngăn ‘na chêh hlá tơbeăng Rơ’jíu Việt Nam hiăng tối ‘na mâu tơdroăng ki trâu hơngế dêi hneăng tơplâ ƀă pơreăng kân COVID-19, châ chêh tối tiô tơdroăng ki phá krê xêh, rơkê plĕng. Mê cho ƀai ki mơnhên tối ki ó rơdêi dêi rơ’jíu, xúa nâl tơpui ki păng ‘nâng, tơdrá hơdruê, ki má lối cho tơdroăng ki khên tơnôu dêi khu chêh hlá tơbeăng, ôh tá xâu tơdroăng xía vâ, hêng klêa, tô hngíu, hâi măng, kăng hngíu, kơxô kơxâm, pơreăng pơrâu, xua khu chêh hlá tơbeăng hiăng khên lăm hlo xup um, thâo xo, chêh xo, chêh tối ‘na tơdroăng ki kuăn pơlê tro tâ pơreăng a Hngêi pơkeăng kân Bạch Mai, Pơlê kong kân Hồ Chí Minh ƀă hên hĕng mâu tíu ki ê...

Teăng mâ khu chêh hlá tơbeăng mê, jâ Buì Thị Thu Trang - Ngế chêh hlá tơbeăng VOV1 tối ăm ‘nâi: Vâ kơ khoh châ ai mâu um, mâu bai chêh, rơkong tơpui ki mê, tơdrăng khât, tơmot khâp tung hiâm mơno dêi mơngế ki tơmâng ngăn tung pơla dế ai pơreăng kân xông tâ tú têi ó, pro kuăn mơngế xâu, préa, mơdrốu ing mê, khoh chiâng ai mâu tơdroăng tơmiât, pêi pro ôh tá tro, tâi tâng mâu kuăn pơlê, tơdroăng ai, tơdroăng hơ’muăn dêi vâ chê 2 hơnăm tung lâp tơnêi têa dế mơdêk ó khât ivá cheăng hbrâ mơdât, khăm pơlât ƀă pơreăng COVID-19, pơla sap hơnăm 2020-2021, ekip ki lăm troh, chêh tối mê hiăng rơkê păng ‘nâng, dó inâi dêi khu chêh hlá tơbeăng Rơ’jíu dêi tơnêi têa, ƀă nâl tơpui, idrâp chuât, tơdrá, ai pơtâ ‘măn tro, ‘ló, ro, kheá kho tro tơdroăng, túa nếo, ƀă mâu tơdroăng ki tối pơchân, hnê tối, tơbâ khĕn khu rơxông chal nếo - klêi kơ’nâi châ hmâng, châ ngăn ƀai chêh ki tơpui mơ’no tung rơ’jíu kố.

“Ki rơhêng vâ tối, tâng tung pơla ai tơdroăng rêh ối tơniăn tiah hmâ, tơdroăng cheăng chêh hlá tơbeăng mê khu ki chêh athế troh a tíu ki vâ chêh, ƀă ƀai, tơdroăng tơpui tung rơ’jíu kố, ekip mê ai 3 ngế, môi ngế hiăng tro F0 dế ối  chêh ƀai a tíu ki pơreăng kân a Pơlê kong kân Hồ Chí Minh, mê cho ngế chêh hlá tơbeăng Nguyễn Thị Minh Hạnh, 2 ngế ki u ối cho ngế chêh hlá tơbeăng Nguyễn Vũ Duy - Kăn pơkuâ ngăn Ban Thời sự-VOV1, á cho Bùi Thị Thu Trang, hiăng ai 4 hdroh athế ối klâ krê xêh môi ngế xua ôu pơkeăng pơlât tiô tơdroăng pơkâ dêi khu ngăn ‘na pơkeăng ƀă khăm pơlât, xua mê, tŭm tơdroăng ki vâ tơpui tơno pơrá athế xúa kơmăi, kơxô̆. Pá puât - pơloăng mơnúa xuân cho tơdroăng ki kal athế chôu vế - ôh tá la lâi kâi piu hiât dêi ekip “Mâu hâi ki ôh tá la lâi kâi piu”.

Hơnăm 2021, pơreăng kân COVID-19 vêh xông tâ tú nếo, pro pá ăm tơdroăng ki chêh hlá tơbeăng, tơ’lêi trâm tơdroăng xía vâ, pơla mê, xuân ai tơdroăng ki tơ’lêi hlâu ăm khu chêh hlá tơbeăng tung tơdroăng lăm troh, lăm chêh tung mâu tơdroăng ki pá tung rêh ối pơlê pơla, kơdroh tah lôi mâu tơdroăng ki tơvâ tơvân, xahpá, xâu xía vâ khoh rĕng troh a tíu ki pơreăng tâ tú hên troh a kuăn pơlê, tơdrêng amê, rơtế ƀă khu ƀok thái pơkeăng, mâu ngế cheăng khăm pơlât vâ veăng tơplâ mơdât pơreăng.

Tiô pôa Phạm Mạnh Hùng, Kăn xiâm phŏ pơkuâ ngăn Rơ’jíu Việt Nam, Kăn xiâm hnê ngăn Khu tơrŭm chêh hlá tơbeăng Rơ’jíu Việt Nam tối, mâu ƀai chêh dêi mâu ngế chêh hlá tơbeăng cheăng tung Rơ’jíu Việt Nam ki châ kâ pri Hlá tơbeăng lâp Tơnêi têa hơnăm 2021 tơkŭm chêh tối mâu tơdroăng ki kal, ki dế ai. Mê cho hneăng ki tơplâ ƀă pơreăng kân COVID-19, hnối pơkâ pêi pro tiô tơdroăng pơkâ dêi Hneăng hôp kân Đảng vâ kring vế, rak tơniăn tuăn hiâm mơno dêi Đảng ƀă hên hĕng mâu tơdroăng ki ê. Xua ing ai tơdroăng ki pá puât dêi pơreăng mê khoh chiâng pro khu ngế chêh hlá tơbeăng dêi Rơ’jíu châ mơhno tối dêi ivá ki mơ-eăm, rơkê tơná tung chêh ƀai, thâo xo, hrik ‘măn tung tơrêm tơdroăng niân, tơdroăng pá, mơjiâng chiâng hlá tơbeăng thăm rế trâu rơdâ, mơhno tối ki ai khât păng ‘nâng ‘na tơdroăng ki sĭng kheá, hiá hĕng, hơ’nêng hơ’no dêi kuăn pơlê.

“Tơdroăng ki hên mâu ƀai chêh, chêh hên túa pơrá phá hiăng châ pơtroh, rah xo tŭm têk tâi tâng, hên hĕng túa dêi khu chêh hlá tơbeăng dêi VOV a tâi tâng mâu túa chêh hlá tơbeăng. Kố xuân cho vêh mơnhên troăng tơdjâ, chông thế vâ khoh chiâng ai dêi môi kơ koan pơkuâ ngăn ‘na chêh hlá tơbeăng ki tŭm túa dêi râ tơnêi têa - kơ koan hlá tơbeăng ki xiâm dêi Tơnêi têa cho tơtro păng  ‘nâng. Hên hơnăm hdrối mê hiá nah, pin hiăng mơ’no liăn ngân ƀă a roh kố châ krí xo dêi mâu tơmeăm ki ƀlêi chiâng cho hlo nhên păng ‘nâng. Ki châ tơƀrê dêi rơnó tơdah xo pri hneăng kố cho tơxâng hâk tơngăm dêi khu chêh hlá tơbeăng dêi VOV”.

Piu hiât dêi châ, khên tơnôu lăm troh, lăm hlo ngăn nhên a mâu tíu ki pá puât, xâu xía, thăm nếo achê ƀă tơdroăng hlâ rêh, mê ƀai chêh ‘’Ki kơtăn pơla hlâ rêh” dêi khu chêh hlá tơbeăng Tạ Quỳnh Tư, Kiều Viết Phong, ối tung Khu tơrŭm chêh hlá tơbeăng Um tơvi Việt Nam châ kâ pri A, cho um phim ki ai khât, hiăng pro hên ngế lo têa mâ, mâu um tung mê cho to mâu tơdroăng ki ai păng ‘nâng, ki cho khât. Mơngế ki ngăn hiăng hlo nhên tơdroăng ki kơdo mơ-eăm, ôh tá xâu hlâ rêh dêi khu ƀok thái pơkeăng, mơngế ki khăm pơlât tung hneăng tơplâ, mơdât ƀă pơreăng, tung mê, ai tá tơdroăng ki piu hiât dêi châ dêi mâu ngế ki chêh hlá tơbeăng, mâu ki lăm chêh ƀai, mâu ki xup, kuai um kố. Ngế chêh hlá tơbeăng Tạ Quỳnh Tư, cheăng tung Um tơvi xiâm Việt Nam, teăng mâ khu ki xup um, kuai phim ai tối:

“Châ kâ pri roh kố pro á chôu vế troh mâu kuăn pơlê ki tro tâ pơreăng COVID-19, ki má lối cho mâu ƀok thái pơkeăng hiăng kơdo mơ-eăm tá ivá mơno vâ tơplâ ƀă pơreăng, vâi ki mê hiăng pơtroh mơhno ăm á ƀai mơhriâm tung rêh kâ ối, tơdroăng ki mơjo pâ ‘na tơdroăng rêh ối xua pơlê pơla kố. Sap ing á mot cheăng chêh hlá tơbeăng ƀă pơxiâm pro phim mê á đi đo tơmiât, hnoăng cheăng pêi pro tro lĕm cho tơdroăng ki phiu ro, tơdroăng pêi pro xôi kô mơjiâng pro ai tơdroăng ki khéa hơ’nêng, xua mê, á khoh khên tơnôu lăm troh, prôk troh, chêh tối, xup um, kuai phim a mâu tơdroăng, mâu ngế ki á tơmiât mê cho vâ tơbâ tối hiâm mơno tung dế tá ki bố bố xuân ai dêi rêm ngế Việt Nam pin”.

Tiô ngế chêh hlá tơbjeăng Nguyễn Đức Lợi, Kăn xiâm phŏ Khu chêh hlá tơbeăng Việt Nam tối, tung 2 hơnăm, pơla sap hơnăm 2020-2021, drêng ai tơdroăng tâ tú dêi pơreăng COVID-19, ai hên khu ngế chêh hlá tơbeăng, mâu ngế thâo hrik dêi mâu kơ koan thŏng tâ̆n, hlá tơbeăng hiăng khên tơnôu troh vâ chêh tối, thâo xo, hrik um a mâu tíu ki xâu xía, thăm nếo ối tơ’lêi trâm ƀă tơdroăng ki hlâ rêh. Ing tơdroăng ki khên tơnôu, khên tơmiât, khên pêi pro dêi khu chêh hlá tơbeăng hiăng mơhno tối mâu tơdroăng ki tro, ki xôi lo a tíu bâ eăng, hiăng châ khu râ seá ngăn mot mơnhên. Mê cho hiâm mơno ki lĕm tro dêi mơngế chêh hlá tơbeăng kal athế pơtối mơnhông ó rơdêi:

“Mâu tơdroăng xiâm ki chêh tối, hên tơdroăng ki xâu xía, tung mê, ai tá tơdroăng hbrâ, tơplâ, mơdât pơreăng, pin kal athế ai mơngế ki khên tơnôu, lăm troh, lăm hlo, lăm ngăn vâ chêh ƀai, xup um, kaui phim. La tung pơla tơplâ, hbrâ, mơdât kâ kơluâ, kâ kơhveăm, mâu tơdroăng ki pro xôi, mê xuân tơ’lêi tro trâm tơdroăng xâu xía, ai tơdroăng ki mơnhâu, thăm nếo tơ’lêi trâm tơdroăng hlâ rêh ƀă mâu ngế ki chêh hlá tơbeăng, ƀă on veăng, rơpŏng hngêi ngế chêh hlá tơbeăng xuân tơ’lêi trâm xâu xía. Ngin tơmiât mâu ngế chêh hlá tơbeăng athế hlê plĕng hên mâu tơdroăng, mê ki ahdrối tâ cho athế hriâm hlê plĕng ‘na luât.

Maluâ tiah mê, cho ngế chêh hlá tơbeăng tâng ôh tá lăm troh, lăm hlo, lăm chêh, ôh tá khên tơnôu mot tung tơdroăng ki pá puât, ki trâu hơngế mê, maluâ tung tơdroăng hbrâ, tơplâ, mơdât kâ kơhveăm mê pin ôh tá la lâi ai ƀai chêh ki ro, ki tro, tâng pin khên lăm troh, lăm chêh xo kô ai hên mâu ƀai chêh ki tơtro, nhên khât”.

Vâ khoh châ chiâng khên tơnôu lăm troh, lăm hlo mâu tíu ki xâu xía, mâu ngế chêh hlá tơbeăng đi đo athế ai hiâm mơno hâk git, vâ khât ƀă hnoăng cheăng dêi tơná, plâi nuih ki mơhno tối vâi vâ troh rơtế ƀă mâu tơdroăng ki ai păng ‘nâng, veăng kum pro ăm pơlê pơla lĕm tro tâ, ‘ló tiô hiâm mơno dêi mâu ngế chêh hlá tơbeăng kăch măng, mê cho ‘’Xo ki lĕm tro, tah lôi ki ‘mêi”.

Kim Thanh- Lại Hoa chêh

Nhat Lisa tơplôu ƀă tơbleăng